BdT 70.3 — Amors, enquera·us preyara

«Amors, enquera·us preyara» di Bernart de Ventadorn (BdT 70.3): testo completo, 66 versi con annotazione sintattica e bibliografia di riferimento.

Bernart de Ventadorn — BdT 70.3

  1. Amors, enquera·us preyara
  2. que·m fossetz plus amoroza,
  3. c’us paucs bes desadolora
  4. gran re de mal ; e paregra
  5. s’era n’aguessetz merce.
  6. car de me no·us sove ?
  7. mas e·m pes qu’enaissi·m prenha
  8. com fetz al comensamen,
  9. can me mis al cor la flama
  10. de leis que·m fetz estar len,
  11. c’anc no m’en detz jauzimen.
  12. Mout viu a gran aliscara
  13. et ab dolor angoissoza
  14. selh cui totz tems assenhora
  15. mala domna ; qu’eu m’estegra
  16. jauzens, mas aissi m’ave
  17. que leis cui dezir, no cre
  18. qu’eu l’am tan c’a mi covenha
  19. l’onors ni·l bes qu’eu n’aten ;
  20. et a·n tort, c’als no reclama
  21. mos cors mas leis solamen
  22. e so c’a leis es plazen.
  23. Totz tems de leis me lauzara,
  24. s’era·m fos plus volontoza,
  25. c’amors, qui·l cor enamora,
  26. m’en det (mais no·m n’escazegra) :
  27. non plazers, mas sabetz que ?
  28. envey’ e dezir ancse !
  29. e s’a leis platz que·m retenha,
  30. far pot de me so talen,
  31. melhs no fa·l vens de la rama,
  32. qu’enaissi vau leis seguen
  33. com la folha sec lo ven.
  34. Tant es fresch’ e bel’ e clara
  35. qu’amors n’es vas me doptoza,
  36. car sa beutatz alugora
  37. bel jorn e clarzis noih negra.
  38. . . . . . . . . . . . . . . . . . . . . . .
  39. . . . . . . . . . . . . . . . . . . . . . .
  40. no·n dic laus, mas mortz mi venha
  41. s’eu no l’am de tot mo sen :
  42. mas, domn’, Amors m’enliama,
  43. que·m fai dir soven e gen
  44. de vos manh ver avinen.
  45. Doussa res, conhd’ et avara,
  46. umils, franch’ et orgolhoza,
  47. bel’ e genser c’ops no fora,
  48. domna, per merce·us queregra.
  49. car vos am mais c’autra re,
  50. que·us prezes merces de me,
  51. car tem que mortz me destrenha,
  52. si pietatz no·us en pren.
  53. e s’eu mor, car mos cors ama
  54. vos, vas cui res no·m defen,
  55. tem que i fassatz falhimen.
  56. Soven plor tan que la chara
  57. n’ai destrech’ e vergonhoza,
  58. e·l vis s’en dezacolora,
  59. car vos, don jauzir me degra,
  60. pert, que de me no·us sove.
  61. e no·m don Dens de vos be,
  62. s’eu sai ses vos co·m chaptenha,
  63. c’aitan doloirozamen
  64. viu com cel que mor en flama ;
  65. e si tot no·m fatz parven,
  66. nulhs om menhs de joi no sen.