BdT 70.28 — Lo doutz temps de pascor

«Lo doutz temps de pascor» di Bernart de Ventadorn (BdT 70.28): testo completo, 68 versi con annotazione sintattica e bibliografia di riferimento.

Bernart de Ventadorn — BdT 70.28

  1. Lo doutz temps de pascor
  2. ab sa doussa verdor
  3. nos adui fuoilla e flor
  4. de diversa color,
  5. per que tuich l’amador
  6. son gai e chantador
  7. mas ieu, que plaing e plor,
  8. c’us jois no m’a sabor.
  9. A totz mi clam, seignor
  10. de midonz e d’amor.
  11. aquist dui trahidor,
  12. car mi fiava en lor,
  13. mi fant viure ab dolor
  14. per ben e per honor
  15. c’ai faich a la genssor,
  16. que no·m val ni·m socor.
  17. Las ! e viure qe·m val ?
  18. car no vei a jornal
  19. mon fin joi natural
  20. en lieich, sotz fenestral
  21. blanc e fresc atretal
  22. cum par neus a nadal,
  23. si c’amdui per egal
  24. mesurem per cabal.
  25. No vim drut tant leial
  26. que pieitz o aia sal,
  27. q’ieu·l port amor coral,
  28. ela·m ditz „no m’en cal“.
  29. enanz dic que per al
  30. no m’ira mortal ;
  31. e si per so·m fai mal,
  32. pechat fai criminal.
  33. Pois fom amdui enfan,
  34. l’ai amada e la blan ;
  35. e vai m’amors doblan
  36. a chascun jorn de l’an.
  37. e si no·is trai enan
  38. amors e beil semblan,
  39. pos er voill e deman
  40. que m’aia bon talan.
  41. Pena e dolor e dan
  42. n’ai agut e n’ai gran ;
  43. mas sofert o ai tan,
  44. no m’o teing ad affan ;
  45. c’anc hom non vi aman,
  46. mieills ames ses engan,
  47. qu’ieu no·m vau cambian
  48. si cum las dompnas fan.
  49. Ben fora oimais sazos,
  50. bella domna e pros,
  51. qe·m fos datz guizerdos
  52. d’un jazer a rescos,
  53. car non sui enoios
  54. (e ja per als no·us fos)
  55. c’us bes val d’autres dos,
  56. quan per forsa es datz dos.
  57. Qan vei vostras faissos
  58. e·l gen cors amoros,
  59. be·m meravill de vos
  60. cum etz de brau respos,
  61. car ben es tracios,
  62. qand hom par francs e bos
  63. e pois es orgoillos
  64. lai on es poderos.
  65. Bels Vezers, si non fos
  66. mos enans totz en vos,
  67. en laissera chanssos
  68. per mal dels enoios.