BdT 70.13 — Be·m cuidei de chantar sofrir

«Be·m cuidei de chantar sofrir» di Bernart de Ventadorn (BdT 70.13): testo completo, 57 versi con annotazione sintattica e bibliografia di riferimento.

Bernart de Ventadorn — BdT 70.13

  1. Be·m cuidei de chantar sofrir
  2. entro lai el doutz tems suau ;
  3. eras, pus negus no s’esjau
  4. e pretz e donar vei morir,
  5. no posc mudar, no prenha cura
  6. d’un vers novel a la frejura,
  7. que conortz er als autres entre lor ;
  8. e cove·m be, pois tan be·m vai d’amor,
  9. c’aya melhor solatz a tota gen.
  10. Domna, vas cal que part que·m vir,
  11. ab vos remanh et ab vos vau.
  12. e sapchatz que de vos me lau
  13. assatz mais que no sai grazir.
  14. be conosc que mos pretz melhura
  15. per la vostra bon’ aventura ;
  16. e car vos plac que·m fezetz tan d’onor
  17. lo jorn que·m detz en baizan vostr’ amor,
  18. del plus, si·us platz, prendetz esgardamen !
  19. Amors, aissi·m faitz trassalhir :
  20. del joi qu’eu ai, no vei ni au
  21. ni no sai que·m dic ni que·m fau.
  22. cen vetz trobi, can m’o cossir,
  23. qu’eu degr’ aver sen e mezura
  24. (si m’ai adoncs ; mas pauc me dura),
  25. c’al reduire·m torna·l jois en error,
  26. pero be sai c’uzatges es d’amor
  27. c’om c’ama be, non a gaire de sen.
  28. Greu en sabrai mo melhs chauzir,
  29. si sas belas faissos mentau,
  30. que res mas lauzars no·m abau
  31. e sas grans beutatz essernir.
  32. res mais no m’en dezasegura !
  33. pois tant es douss’ e fin’ e pura,
  34. gran paor ai qu’azesme sa valor ;
  35. e lauzenger volon mo dan d’amor
  36. e diran l’en be leu adiramen.
  37. Doncs lor deuri’eu be servir,
  38. pois vei que re guerra no·m vau,
  39. que s’ab lauzengers estau mau,
  40. greu·m poiria d’amor jauzir.
  41. per leis es razos e mezura
  42. qu’eu serva tota creatura ;
  43. neis l’enemic dei apelar senhor,
  44. c’ab gen parlar conquer om melhs d’amor
  45. tot lo pejor ad ops de be volen.
  46. Amors, cil que·us volon delir,
  47. son enoyos e desliau.
  48. e si·us deschanton, me qu’eu cau ?
  49. no·s podon melhs envilanir.
  50. be conosc a lor parladura
  51. qu’ilh renhon mal, contra natura,
  52. cist an perdut vergonha e paor,
  53. partit de Deu, tot per sordeg d’amor !
  54. et eu sui fols, si mais ab lor conten.
  55. Ventadorn er greu mais ses chantador,
  56. que·l plus cortes e que mais sap d’amor
  57. m’en essenhet aitan com eu n’apren.