BdT 389.8 — Amors, cum er? Que faray?

«Amors, cum er? Que faray?» di Raimbaut d'Aurenga (BdT 389.8): testo completo, 61 versi con annotazione sintattica e bibliografia di riferimento.

Raimbaut d'Aurenga — BdT 389.8

  1. Amors, cum er? Que faray?    
  2. Morrai frescx, joves e sas,  
  3. enaissi dins vostras mas?    
  4. Oc! Murir, si·m pliu per vos!
  5. Ades m’i pleu pauc mos pros; 
  6. e totz temps, tan cum ieu viva,
  7. cum que m’en an, m’i pliuray.  
  8. Per qu’ieu fauc avol essai     
  9. pos aissi vos suy humas;       
  10. qu’en feyratz s’ie·us fos trefas,    
  11. mals e felhs ez ergulhos?            
  12. Fora·n plus aventuros —              
  13. Oc! So·m par, pos ar esquiva         
  14. m’es, quar ves vos franc cor ay.     
  15. Ades mi datz plus d’esmay            
  16. on mielhs suy ves vos sertas.        
  17. E fauc hi ben que vilas,             
  18. quar per mal suy amoros.             
  19. Mas no say esser anctos              
  20. vas vos, qu’ades recaliva            
  21. mos leus cors on piegz m’en vay.   
  22. Mas vos avetz — don morrai,        
  23. Amors — l’us de Barrabas;          
  24. que·ls vostres faitz soteiras      
  25. — qu’estan mal, per qu’ieu viu blos —
  26. no faitz ges als plus iros,          
  27. mas ves aquels etz ombriva           
  28. qu’avetz en poder ses play.          
  29. Per que, si·m peza, dirai,           
  30. Amors, tan ves vos que cas:          
  31. ades o dic — suy auras               
  32. de vos; q’anc mala sai fos           
  33. vostr’aventura mest nos!             
  34. E tem a dir ... quals? — C’om pliva  
  35. so que·us cofon e·us dechay.         
  36. Mas ieu o dic; e si·n bray           
  37. ni m’en desmen hom vilas,            
  38. vengua armatz en us plas;            
  39. e sia orbs o gelos,                  
  40. s’ieu no volri’ esser jos,           
  41. vencutz; qui·s vol, so escriva;      
  42. sol vers no fos si·m n’esglay.       
  43. Mas non es de mar en sai,            
  44. ni lay on es flums Jordas,           
  45. Sarrazis ni Crestias                 
  46. qu’ieu non venques tres o dos;       
  47. e s’ai dig que enojos,               
  48. ma grans dolors m’en abriva          
  49. que·m fai ver dir e no·m play.       
  50. E s’ieu en fauc semblan guay         
  51. ni·m depenh cueynhdes e vas,         
  52. si tot m’ai bos ermitas              
  53. estat et enquar ploros;     
  54. e bos hom religios          
  55. serai (tot per gent geliva) 
  56. tostemps, si·l cor no m’en tray.
  57. E ma chanso si no fos           
  58. alques ves Amor esquiva,        
  59. tengra ves Rodes en lay         
  60. Comtessa nominativa,            
  61. pros e bell’ ab cor veray.