BdT 389.25 — Dona, si m’auzes rancurar

«Dona, si m’auzes rancurar» di Raimbaut d'Aurenga (BdT 389.25): testo completo, 67 versi con annotazione sintattica e bibliografia di riferimento.

Raimbaut d'Aurenga — BdT 389.25

1. Dona, si m’auzes rancurar         
2. de vos ploran mi clamera,         
3. mas no vos deg encolpar           
4. qu’ieu sai be que tan valetz      
5. que tot qan faitz e dizetz        
6. m’es bon, si tot a me tira.       
7. Mas Dieu, que no faill en re,     
8. pregua lo hom de son be,          
9. e donx ben dei ieu vos preguar:   
10. ja no·us en devetz far fera,      
11. pos re no vos aus blasmar;        
12. mas parlar be·m sufriretz —       
13. Oc, tan qu’ieu en soi meils letz, —
14. c’aillor ma lengua no·s vira;      
15. mas en vos clamar merce            
16. non ten pro ni no·m sove.          
17. Si saubes tan Dieu predicar        
18. ben sai c’ap se m’alberguera.      
19. C’ades, cant ieu cug orar,         
20. dei pregar a Dieu, creisetz,       
21. que fos ab vos lai on etz          
22. que d’als mos cors non consira     
23. si que non-poders lo te            
24. qu’ar lai non cor ab l’ale.        
25. Pos tan vos platz eschausar        
26. no sai si·m dirai “Trop era,       
27. dona, que·m denhetz baizar.”       
28. E donx com sufrir podetz           
29. que·us bais? Pos tan mi valetz     
30. quar ab aquel be morira            
31. adoncs marves! (Per ma fe,         
32. si penses so, car m’en ve.)       
33. Bela doussa dona (si·us par        
34. qu’ieu no vailla tant enquera      
35. que·m dejatz ab vos colgar)        
36. neis del be que fag m’avetz        
37. no fo anc re si temetz             
38. c’aiatz faillit; qu’ieu faillira
39. e tanh meils que·ill mortz m’en me
40. que ja vos faillatz per me.       
41. Domna, si me voletz pagar,        
42. ab aitan que plus no·us quera     
43. com eu n’ai, podetz o far         
44. qu’eu non ai (be o sabetz)        
45. sens vos honor ni nuill pretz     
46. per que mos cors no s’adira       
47. com que·m menetz, ni·s cove       
48. pus res vas vos no·m mante.       
49. Per que·us deu ben esser plus car,
50. mas mos cors ves vos s’esmera     
51. si que res no i pot camjar:       
52. qu’ieu sai tal, si m’en crezetz,  
53. que val for vos d’autras detz,    
54. qu’eu, si·m volgues, m’en jauzira;
55. mas si·m tenetz ferm el fre       
56. c’autra no·m platz que·m n’estre. 
57. Dona, Dieu saubr’ ieu ensenhar    
58. so don totz molt meillurera       
59. que tolgues c’om en amar          
60. no pogues far tort ni vetz        
61. si nuill mal parlar no . . . etz  
62. que no·i fail qui fortz sospira   
63. ni trop au ni sent ni ve,         
64. ni conois ni sap ni cre.          
65. Dona, onguan cai’ en mal ira      
66. sel qu’encontra vos ni me         
67. ditz re ni conois ni cre.