BdT 389.13 — Ar m’er tal un vers a faire

«Ar m’er tal un vers a faire» di Raimbaut d'Aurenga (BdT 389.13): testo completo, 82 versi con annotazione sintattica e bibliografia di riferimento.

Raimbaut d'Aurenga — BdT 389.13

1. Ar m’er tal un vers a faire           
2. que ja no·m feira fraitura;           
3. qu’ar es enves mi escura              
4. cil qe·m fai mal per ben traire.      
5. Adolen,                               
6. faillimen                             
7. fui, qe·m ven!                        
8. Ben aic lai doncs pauc de sen         
9. s’ieu anc fui ves lieis bauzaire!     
10. Seigner Dieus! Cum aus retraire       
11. tan gran ma desaventura?              
12. Mos dols non ac anc mesura            
13. qe·m trastorna·l cor en caire.        
14. Si espren                             
15. aspramen                              
16. mon talen                             
17. ira, e·m mou marrimen                 
18. quand ieu·m cuig far de joi fraire.   
19. En ploran serai chantaire             
20. puois nuills gaugz no·m asegura, —    
21. car Mos Bos Respieitz pejura          
22. que·m val mos chantars? Qu’ar laire.  
23. Fol tormen                            
24. per parven                            
25. vauc seguen                           
26. s’als non ai mas marrimen             
27. e dol e dolor e braire.               
28. Desastrucs nasqiei de maire           
29. puois totz mals mi apejura.           
30. Ben es fols qui mal m’agura!          
31. Pieitz cum posc aver? Pechaire! —     
32. Neis qui·m pen                         
33. aut al ven                             
34. a presen!                              
35. Cel tenrai per benvolen                
36. qu’ams los huoills m’en volra traire.  
37. Dolsa dompna de bon aire               
38. no·m gitetz tant a non·cura!           
39. Ve·us que tolt avetz dreitura          
40. s’ab merce·l cors no·us esclaire.      
41. Qu’ieu n’aten                          
42. chausimen                              
43. si·us es gen,                          
44. si non faitz me peneden                
45. issir fors de mon repaire.             
46. Que, per l’arma de mon paire,          
47. si·l vostre durs cors s’atura,         
48. no·m tenra murs ni clausura            
49. q’ieu non iesca de mon aire            
50. mantenen                               
51. ves tal sen                            
52. don fort len                           
53. me veiran mais miei paren.             
54. Mas vos non o prezatz gaire.           
55. Dompna, cel qui es jutgaire            
56. perdonet gran forfaitura               
57. a cel — so ditz l’escriptura —         
58. qe era traicher e laire!               
59. Eissamen                               
60. en son sen,                            
61. qui non men                            
62. e non perdona corren —                 
63. ja no·il er Dieus perdonaire!          
64. Per vos am, dompn’ ab cor vaire        
65. las autras tant co·l mons dura,        
66. car son en vostra figura;              
67. que per als no·n sui amaire!—          
68. Neis la gen                            
69. pauc valen,                            
70. mal volen,                             
71. neis cels qe·us vezon soven!           
72. Mas non lor n’aus far vejaire.         
73. Domna, pren                            
74. un coven                               
75. avinen: —                              
76. si mais paz comandamen                 
77. ja no·m perdon neus vejaire.           
78. E si·us men           
79. en coven              
80. qe·us prezen,         
81. ogan si’ eu malamen   
82. entuissequatz ab varaire!