BdT 29.5 — Autet e bas entre·ls prims fueills

«Autet e bas entre·ls prims fueills» di Arnaut Daniel (BdT 29.5): testo completo, 57 versi con annotazione sintattica e bibliografia di riferimento.

Arnaut Daniel — BdT 29.5

  1. Autet e bas entre·ls prims fueills
  2. son nou de flors els rams li renc
  3. e no·i ten mut bec ni gola
  4. nuls ausels, ans brai e chanta
  5. cadaüs
  6. en son us:
  7. per ioi c'ai d'els e del temps
  8. chan, mas amors mi asauta,
  9. qui·lz motz ab lo son acorda.
  10. Deu o grazisc e a mos oills
  11. que per lor conoisensa·m venc
  12. iois, c'a dreg ausi e fola
  13. l'ira qu'eu n'avi'e l'anta:
  14. er vau sus,
  15. qui qu'en mus
  16. d'amor, don soi fis e ferms,
  17. c'ab lei c'al cor plus m'auzauta
  18. soi liaz ab ferma corda.
  19. Merces, amors: qu<e> ar m'acuoills
  20. tart mi fon, mas en gra m'o prenc,
  21. car si m'art dinz la meola
  22. lo focs, non voill que s'escanta,
  23. mas pels us
  24. estau clus
  25. que d'autrui ioi fan gros gems,
  26. e pustell'ai'en sa gauta
  27. cel c'ab lei si desacorda.
  28. De bon'amor falsa l'escuoillz
  29. e drutz es tornaz en fadenc
  30. que di que·l parlars no·l cola
  31. nuilla ren, c'a cor creanta
  32. de prez ius,
  33. car enfrus
  34. es d'aquo qu'eu mout ai crems,
  35. e qui de parlar trasauta
  36. drez es qu'en la lenga·s morda.
  37. Vres es qu'eu l'am et es orgoills,
  38. mas ab iauzir selar lo trenc,
  39. c'anc puois sains Pauls fez pistola
  40. ni nuils hom dejus .xl.,
  41. non poc plus
  42. neis ensus
  43. far de tals, car<a> absems
  44. ab los aibs, don plus s'aauta
  45. c'ellas c'om per pros recorda.
  46. Pretz e valors, vostres chanduoills
  47. es la bella c'ab si·m retenc,
  48. qui m'a sol et eu lei sola
  49. c'autr'el mon no m'atalanta,
  50. anz soi brus
  51. et estrus
  52. a·ls autras e·l cor teing prems,
  53. mas pel seu ioi trep'e sauta,
  54. non voill c'autra m'o comorda.
  55. Arnauz ama e non diz nems,
  56. c'amors m'afrena la gauta
  57. que fols gaps no la comorda.