BdT 70.16 — Conortz, era sai eu be

« Conortz, era sai eu be » de Bernart de Ventadorn (BdT 70.16) : texte intégral, 54 vers annotés syntaxiquement et bibliographie de référence.

Bernart de Ventadorn — BdT 70.16

1. Conortz, era sai eu be
2. que ges de me no pensatz,
3. pois salutz ni amistatz
4. ni messatges no m’en ve.
5. trop cuit que fatz lonc aten,
6. et er be semblans oimai
7. qu’eu chasse so c’autre pren,
8. pois no m’en ven aventura.
9. Bels Conortz, can me sove
10. com gen fui per vos onratz
11. e can era m’oblidatz.
12. per un pauc no·n mor desse !
13. qu’eu eis m’o vauc enqueren,
14. qui·m met de foudat em plai,
15. can eu midons sobrepren
16. de la mia forfaitura.
17. Per ma colpa m’esdeve
18. que ja no·n sia privatz,
19. car vas leis no sui tornatz
20. per fondat que m’en rete.
21. tan n’ai estat lonjamen
22. que de vergonha qu’eu n’ai.
23. non aus aver l’ardimen
24. que i an, s’ans no m’asegura.
25. Ilh m’encolpet de tal re
26. don me degra venir gratz.
27. fe qu’eu dei a l’Alvernhatz,
28. tot o fi per bona fe.
29. e s’eu en amar mespren,
30. tort a qui colpa m’en fai,
31. car, qui en amor quer sen,
32. cel non a sen ni mezura.
33. Tan er gen servitz per me
34. sos fers cors durs et iratz,
35. tro del tot si’ adoussatz
36. ab bels dihz et ab merce ;
37. qu’eu ai be trobat legen
38. que gota d’aiga que chai,
39. fer en un loc tan soven,
40. tro chava la peira dura.
41. Qui be remira ni ve
42. olhs e gola, fron e faz,
43. aissi son finas beutatz
44. que mais ni menhs no i cove :
45. cors lonc, dreih e covinen,
46. gen afliban, conhd’ e gai.
47. om no·l pot lauzar tan gen
48. com la saup formar Natura.
49. Chansoneta, ar t’en vai
50. a Mo Frances, l’avinen,
51. cui pretz enans’ e melhura ;
52. E digas li que be·m vai,
53. car de Mo Conort aten
54. enquera bon’ aventura.