BdT 389.32 — Non chant per auzel ni per flor

« Non chant per auzel ni per flor » de Raimbaut d'Aurenga (BdT 389.32) : texte intégral, 52 vers annotés syntaxiquement et bibliographie de référence.

Raimbaut d'Aurenga — BdT 389.32

  1. Non chant per auzel ni per flor   
  2. ni per neu ni per gelada,         
  3. ni neis per freich ni per calor   
  4. ni per reverdir de prada;         
  5. ni per nuill autr’esbaudimen      
  6. non chan ni non fui chantaire,    
  7. mas per midonz en cui m’enten,    
  8. car es del mon la bellaire.       
  9. Ar sui partitz de la pejor        
  10. c’anc fos vista ni trobada,       
  11. et am del mon la bellazor         
  12. dompna, e la plus prezada;        
  13. e farai ho al mieu viven:         
  14. que d’alres non sui amaire,       
  15. car ieu cre qu’ill a bon talen    
  16. ves mi, segon mon vejaire.        
  17. Ben aurai, dompna, grand honor    
  18. si ja de vos m’es jutgada         
  19. honranssa que sotz cobertor       
  20. vos tenga nud’ embrassada;        
  21. car vos valetz las meillors cen!  
  22. Q’ieu non sui sobregabaire —      
  23. sol del pes ai mon cor gauzen     
  24. plus que s’era emperaire!         
  25. De midonz fatz dompn’ e seignor   
  26. cals que sia·il destinada.        
  27. Car ieu begui de la amor          
  28. ja·us dei amar a celada.          
  29. Tristan, qan la·il det Yseus gen  
  30. e bela, no·n saup als faire;      
  31. et ieu am per aital coven         
  32. midonz, don no·m posc estraire.   
  33. Sobre totz aurai gran valor       
  34. s’aitals camisa m’es dada         
  35. cum Yseus det a l’amador,         
  36. que mais non era portada.         
  37. Tristan! Mout presetz gent presen:
  38. d’aital sui eu enquistaire!       
  39. Si·l me dona cill cui m’enten,    
  40. no·us port enveja, bels fraire.   
  41. Vejatz, dompna, cum Dieus acor    
  42. dompna que d’amar s’agrada.       
  43. Q’Iseutz estet en gran paor,      
  44. puois fon breumens conseillada;   
  45. qu’il fetz a son marit crezen     
  46. c’anc hom que nasques de maire    
  47. non toques en lieis. — Mantenen   
  48. atrestal podetz vos faire!        
  49. Carestia, esgauzimen              
  50. m’aporta d’aicel repaire          
  51. on es midonz, qe·m ten gauzen     
  52. plus q’ieu eis non sai retraire.