BdT 389.21 — Braiz, chans, quils, critz

« Braiz, chans, quils, critz » de Raimbaut d'Aurenga (BdT 389.21) : texte intégral, 53 vers annotés syntaxiquement et bibliographie de référence.

Raimbaut d'Aurenga — BdT 389.21

  1. Braiz, chans, quils, critz            
  2. aug dels auzels pels plaissaditz. —   
  3. Oc! Mas no los enten ni deinh;        
  4. c’un’ira·m cenh                       
  5. lo cor, on dols m’a pres razitz,      
  6. per q’en sofer.                       
  7. Si·m fos grazitz                      
  8. mos chantars, ni ben acuillitz        
  9. per cella que m’a en desdeing,        
  10. d’aitan mi feing                      
  11. q’en mains bons luocs for’ enbrugitz  
  12. mais que non er.                      
  13. Tristz e marritz                      
  14. es mos chantars aissi fenitz          
  15. per totz temps mais tro q’ela·m deing 
  16. pel sieu manteing;                    
  17. era mos bos, er es delitz!            
  18. Mas no·l sofer!                       
  19. Jois m’es fugitz!                     
  20. Un pauc mas tost mi fon faillitz!     
  21. S’anc mi volc, er m’a en desdeing.    
  22. Com no·m esteing                      
  23. can precs ni merces ni destritz       
  24. re no i conquer?                      
  25. Mos cors me ditz                      
  26. “Per qe soi per liei envilitz?” —     
  27. “Car sap que nuill’autra non deing,   
  28. per so·m n’estreing.”                 
  29. Morrai, car mos cors enfollitz        
  30. mas ges non quer.                     
  31. Cum sui trahitz!                      
  32. Bona dompn’ ab talan voutitz,         
  33. ab cor dur, a! nuill’ als non deing,  
  34. mesclat ab geing.                     
  35. Volretz que torn flacs·endurzitz,     
  36. o que demer!                          
  37. Trop sui arditz!                      
  38. Dompna, mos sens eissabozitz          
  39. m’a faitz dir fols motz q’ieu non deing:
  40. contra mi reing.                        
  41. Tant sui fors de mon sen issitz         
  42. non sent qi·m fer.                      
  43. Mout es petitz,                         
  44. dompna, ·l tortz q’ieu vos ai servitz,  
  45. per que vos m’avetz en desdeing.        
  46. Fatz n’esdeveing!                       
  47. Pendutz fos aut per la cervitz          
  48. qui a moiller!                          
  49. Humils, ses geing,                      
  50. dompna, ·l vostre sers fals-faillitz    
  51. merce vos quer.                         
  52. Mas Pretz, non Sobrans’, es tequitz:    
  53. don en vos er.