BdT 293.29 — L’autrier, a l’issuda d’abriu

« L’autrier, a l’issuda d’abriu » de Marcabru (BdT 293.29) : texte intégral, 31 vers annotés syntaxiquement et bibliographie de référence.

Marcabru — BdT 293.29

  1. L’autrier, a l’issuda d’abriu
  2. en uns pasturaus lonc un riu,
  3. et ab lo comens d’un chantiu
  4. que fant l’auzeill per alegrar,
  5. auzi la votz d’un pastoriu
  6. ab una mancipa chantar.
  7. Trobiei la sotz un fau ombriu:
  8. . . . . . . . . . . . . . . . .
  9. «Bella, fich m’ieu, pois jois reviu,
  10. ben nos devem apareillar».
  11. «Non devem, don, que d’als pensiu
  12. ai mon coratge e mon affar».
  13. «Digatz, bella, del pens cum vai
  14. on vostre coratges estai?»
  15. «A ma fe, don, ieu vos dirai:
  16. s’aisi es vers cum aug comtar,
  17. pretz e jovens e jois dechai
  18. c’om en autre no·is pot fiar.
  19. (Missing)
  20. D’autra manieira cogossos
  21. hi a rics homes e baros
  22. que las enserron dinz maios
  23. q’estrains non i posca intrar,
  24. e tenon guirbautz als tizos
  25. cui las comandon a gardar.
  26. E segon que ditz Salamos,
  27. non podon cill peiors lairos
  28. acuillir d’aqels compaignos
  29. qui fant lo noirim cogular,
  30. et aplanon los guirbaudos
  31. e cuion lor fills piadar».