BdT 29.7 — D'autra guiza e d'autra razo

« D'autra guiza e d'autra razo » de Arnaut Daniel (BdT 29.7) : texte intégral, 35 vers annotés syntaxiquement et bibliographie de référence.

Arnaut Daniel — BdT 29.7

  1. D'autra guiza e d'autra razo
  2. m'aven a chantar que no sol,
  3. e no·us cugetz que de mon dol
  4. epser a far bona chanso,
  5. mas mestier m'es qu'ieu fassa merceiar
  6. a moutz, chantan lieis qui m'encolp'a tort,
  7. qu'ieu n'ai lezer qu'estiers non parl'ab tres.
  8. Merce dei trobar e perdo
  9. si·l dreitz uzatges no·m destol
  10. tal que de merceiar no·m col;
  11. ja salvet merces lo lairo,
  12. qu<e> autre be no·l podia salvar:
  13. ieu non ai plus ves ma vida confort
  14. que, si·l dreit c'ai no·m val, valha·m merces.
  15. Donc a hom dreg en amor? Non,
  16. mas cuiarion·s'o li fol,
  17. qu'ela·ns encolpara, si·s vol,
  18. car li Frances no son Gasco
  19. e car la naus frais ans que fos a Bar:
  20. las, per aital colpa sui pres de mort,
  21. que d'als, per Crist, no sai qu'ieu tort l'agues.
  22. Ar conosc ieu e sap mi bo
  23. c'om no·s part leu de so que vol,
  24. ans n'a cor plus humil e mol
  25. si tot l'estrai un tems son do:
  26. per mi·us o dic, c'anc no·m puec dezamar
  27. selha que·m tolh del tot ioi e deport,
  28. ans m'afortis ades on pieger m'es.
  29. Huei mais, senhor e companho,
  30. per Dieu, ans que del tot m'afol
  31. preiatz leis, don m'amor no·s tol,
  32. que n'aia merce cum del so
  33. e diguas tug, pus no la·us aus nomnar:
  34. Bela, prendetz per nos n'Arnautz en cort
  35. e no metatz son chantar en deves.