BdT 29.6 — Chanson do·l mot son plan e prim

« Chanson do·l mot son plan e prim » de Arnaut Daniel (BdT 29.6) : texte intégral, 58 vers annotés syntaxiquement et bibliographie de référence.

Arnaut Daniel — BdT 29.6

  1. Chanson do·l mot son plan e prim
  2. fas mas era botono·l vim,
  3. e·l ausor sim
  4. son de color
  5. de manta flor,
  6. e verdeia la fuoilla,
  7. e·ill chant e·ill braill
  8. sona^a l'ombraill
  9. dels ausels per la brueilla.
  10. Pe·l brueil aug lo chant e·l refrim
  11. e, per qu<e> om no·m fassa crim,
  12. obri e lim
  13. motz de valor
  14. ab art d'amor,
  15. don non ai cor que·m tueilla,
  16. ans si be·m faill
  17. la sec a traill
  18. on plus vas mi s'orgueilla.
  19. Petit val orgoills d'amador
  20. c'ades trabuca son seignor
  21. del loc ausor
  22. ios en terraill
  23. per tal trebaill
  24. que de ioi lo despueilla:
  25. dreitz es lacrim,
  26. arga e rim
  27. qui 'ncontr'amor iangloilla.
  28. Bona domna ves cui ador,
  29. ges per iangloill non vauc aillor,
  30. mas per paor
  31. del devinaill,
  32. don iois trasaill,
  33. fas semblan que no·us voilla,
  34. c'anc no·ns iauzim
  35. de lor noirim:
  36. malmes qui lor o cuoilla.
  37. Si ben vauc per tot a desdaill,
  38. mos pessamenz lai vos assaill,
  39. qu'ieu chant e vail
  40. pe·l ioi que·nz fim
  41. lai on partim:
  42. mout soven l'oill mi mueilla
  43. d'ir'e de plor
  44. e de dousor,
  45. car per ioi ai que·m duoilla.
  46. Er ai fam d'amor don badaill
  47. e non sec mesura ni taill:
  48. sols m'o egail,
  49. que anc n'ovim
  50. del temps Caim
  51. amador menz acueilla
  52. cor trichador
  53. ni bausador,
  54. per que mos iois capdueilla.
  55. Bella, qui que·s destueilla,
  56. Arnauz dreitz cor
  57. lai o·es honor,
  58. car vostre pretz capdueilla.