BdT 262.2 — Lanquan li jorn son lonc en mai

« Lanquan li jorn son lonc en mai » de Jaufre Rudel (BdT 262.2) : texte intégral, 52 vers annotés syntaxiquement et bibliographie de référence.

Jaufre Rudel — BdT 262.2

  1. Lanquan li jorn son lonc en mai
  2. m’es belhs dous chans d’auzelhs de lonh,
  3. e quan me sui partitz de lai
  4. remembra·m d’un’amor de lonh:
  5. vau de talan embroncx e clis, 
  6. si que chans ni flors d’albespis
  7. no·m platz plus que l’iverns gelatz.
  8. Ja mais d’amor no·m jauzirai
  9. si no·m jau d’est’amor de lonh:
  10. que gensor ni melhor no·n sai  
  11. ves nulha part, ni pres ni lonh.
  12. Tant es sos pretz verais e fis
  13. que lai el reng dels sarrazis
  14. fos ieu per lieis chaitius clamatz!
  15. Iratz e gauzens m’en partrai,  
  16. s’ieu ja la vei, l’amor de lonh;
  17. mas no sai quoras la veirai,
  18. car trop son nostras terras lonh:
  19. assatz i a pas e camis,
  20. e per aisso no·n sui devis... 
  21. Mas tot sia cum a Dieu platz!
  22. Be·m parra jois quan li querrai,
  23. per amor Dieu, l’alberc de lonh:
  24. e, s’a lieis platz, alberguarai
  25. pres de lieis, si be·m sui de lonh. 
  26. Adoncs parra·l parlamens fis
  27. quan drutz lonhdas er tan vezis
  28. qu’ab cortes ginh jauzis solatz.
  29. Ben tenc lo Senhor per verai
  30. per qu’ieu veirai l’amor de lonh; 
  31. mas per un ben que m’en eschai
  32. n’ai dos mals, quar tan m’es de lonh.
  33. Ai! car me fos lai pelegris,
  34. si que mos fustz e mos tapis
  35. fos pels sieus belhs huelhs remiratz! 
  36. Dieus, que fetz tot quant ve ni vai
  37. e formet sest’amor de lonh,
  38. mi don poder, que cor ieu n’ai,
  39. qu’ieu veia sest’amor de lonh,
  40. veraiamen, en tals aizis, 
  41. si que la cambra e·l jardis
  42. mi resembles totz temps palatz!
  43. Ver ditz qui m’apella lechai
  44. ni deziron d’amor de lonh,
  45. car nulhs autres jois tan no·m plai  
  46. cum jauzimens d’amor de lonh.
  47. Mas so qu’ieu vuelh m’es atahis,
  48. qu’enaissi·m fadet mos pairis
  49. qu’ieu ames e nos fos amatz.
  50. Mas so qu’ieu vuelh m’es atahis.  
  51. Totz sia mauditz lo pairis
  52. que·m fadet qu’ieu non fos amatz!