BdT 183.2 — Ben vueill que sapchon li pluzor

« Ben vueill que sapchon li pluzor » de Guglielmo IX (BdT 183.2) : texte intégral, 62 vers annotés syntaxiquement et bibliographie de référence.

Guglielmo IX — BdT 183.2

1. Ben vueill que sapchon li pluzor
2. d’un vers, si es de bona color
3. qu’ieu ai trat de bon obrador;
4. qu’ieu port d’aicel mester la flor,
5.     et es vertatz,
6. e puesc ne trair lo vers auctor,
7.     quant er lasatz.
8. Eu conosc ben sen e folor,
9. e conosc anta et honor,
10. et ai ardiment e paor;
11. e si·m partetz un joc d’amor,
12.     no soi tan fatz
13. no sapcha triar lo meillor
14.     d’entre·ls malvatz.
15. Eu conosc be sel que be·m di
16. e sel que·m vol mal atressi;
17. e conosc be celui que·m ri,
18. e sels que s’azauton de mi
19.     conosc assatz:
20. e atressi dei voler lur fi
21.     e lur solatz.
22. Ben aia cel que me noiri,
23. que tan bon mester m’escari
24. que anc a negun no·n failli:
25. qu’ieu sai jogar sobre coisi
26.     a totz tocatz;
27. mas no sai de nuill mon vezi,
28.     qual que·n vejatz.
29. Deu en laus e saint Julia:
30. tant ai apres del joc dousa
31. que sobre totz n’ai bona ma;
32. ja hom que conseill me querra
33.     no l’er vedatz,
34. ni nuils de mi non tornara
35.     desconseillatz.
36. Qu’ieu ai nom maistre certa:
37. ja m’amigu’anueg no m’aura
38. que no·m vueill’aver l’endema;
39. qu’ieu soi be d’est mester, so·m va,
40.     tant ensenhatz
41. que be·n sai gazanhar mon pa
42.     en totz mercatz.
43. Pero no m’auzes tan gaber
44. qu’ieu no fos rahuzatz l’autrer,
45. que jogav’a un joc grosser
46. que·m fo trop bos al cap primer
47.     tro fo entaulatz;
48. quan gardei, no m’ac plus mester,
49.     si·m fo camjatz.
50. Mas ela·m dis un reprover:
51. “Don, vostre datz son menuder
52. et ieu revit vos a dobler!”
53. Fis·m ieu: “Qui·m dava Monpesler
54.     no er laisatz!”
55. E levei un pauc son tauler
56.     ab ams mos bratz.
57. E quan l’aic levat lo tauler
58.     espeis los datz:
59. e·l dui foron cairat nualler,
60.     e·l terz plombatz.
61. E fi·ls ben ferir al tauler,
62.     e fon jogatz.