BdT 70.26 — Lancan vei per mei la landa

«Lancan vei per mei la landa» de Bernart de Ventadorn (BdT 70.26): texto completo, 48 versos con anotación sintáctica y bibliografía de referencia.

Bernart de Ventadorn — BdT 70.26

  1. Lancan vei per mei la landa
  2. dels arbres chazer la folha,
  3. ans que·lh frejura s’espanda
  4. ni·l gens termini s’esconda,
  5. m’es bel que si’ auzitz mos chans,
  6. qu’estat n’aurai mais de dos ans,
  7. e cove que·n fass’ esmenda.
  8. Mout m’es greu que ja reblanda
  9. celeis que vas me s’orgolha,
  10. car si mos cors re·lh demanda,
  11. no·lh platz que mot m’i responda.
  12. be m’auci mos nescis talans,
  13. car sec d’amor los bels semblans
  14. e no ve c’amors lh’atenda.
  15. Tan sap d’engenh e de ganda
  16. c’ades cuit c’amar me volha.
  17. be doussamen me truanda,
  18. c’ab bel semblan me cofonda !
  19. domna, so no·us es nuls enans,
  20. que be cre qu’es vostres lo dans,
  21. cossi que vostr’om mal prenda.
  22. Deus, que tot lo mon garanda,
  23. li met’ en cor que m’acolha,
  24. c’a me no te pro vianda
  25. ni negus bes no·m aonda.
  26. tan sui vas la bela doptans,
  27. per qu’e·m ren a leis merceyans :
  28. si·lh platz, que·m don o que·m venda !
  29. Mal o fara, si no·m manda
  30. venir lai on se despolha,
  31. qu’eu sia per sa comanda
  32. pres del leih, josta l’esponda,
  33. e·lh traya·ls sotlars be chaussans,
  34. a genolhs et umilians,
  35. si·lh platz que sos pes me tenda.
  36. Faihz es lo vers tot a randa,
  37. si que motz no·i deschapdolha,
  38. outra la terra normanda,
  39. part la fera mar prionda ;
  40. e si·m sui de midons lonhans,
  41. vas se·m tira com azimans
  42. la bela cui Deus defenda.
  43. Si·l reis engles e·l ducs normans
  44. o vol, eu la veirai abans
  45. que l’iverns nos sobreprenda.
  46. Pel rei sui engles e normans.
  47. e si no fos Mos Azimans,
  48. restera tro part calenda.