BdT 389.5 — Als durs, crus, cozens, lauzengiers

«Als durs, crus, cozens, lauzengiers» de Raimbaut d'Aurenga (BdT 389.5): texto completo, 69 versos con anotación sintáctica y bibliografía de referencia.

Raimbaut d'Aurenga — BdT 389.5

1. Als durs, crus, cozens, lauzengiers
2. — enojos, vilans, mals parliers —
3. dirai un vers que m’ai pensat;
4. que ja d’als no·i aura parlat,
5. qu’a pauc lo cor no m’esclata
6. d’aisso qu’ieu ai vist e proat
7. de lur malserva barata.
8. E dirai vos de lur mestiers
9. si cum selh qu’en es costumiers
10. d’auzir e de sufrir lur glat.
11. Si·m peza, mas non er laissat
12. qu’ieu ab mal dir no·ls combata;
13. e ja del plus no·m sapchon grat
14. qar mos cors totz non los mata.
15. Lauzenjador fan encombriers
16. als cortes et als dreituriers
17. e a cellas qu’an cor auzat;
18. e quecx per aquel eis mercat
19. a l’autre cobre et aplata
20. son verguonhos avol barat —
21. aissi son de fer’escata!
22. Per que·y falh totz bos cavaliers
23. que·ls cre; q’us non l’es plazentiers
24. mas per qu’en traga mielhs son at;
25. qu’il pesson, ist malaurat!
26. Pus d’als non val una rata
27. des que·l fara so voluntat
28. o·lh dira lauzenja grata.
29. D’autres n’i a que van estiers,
30. que·s fa quecx cortes ufaniers;
31. que per outracujar mot fat,
32. o cuj’ aver mielhs guazanhat
33. cel qu’a plus la lengua lata
34. en dir de partir l’amistat
35. de cels en cui Jois s’afata.
36. Que·ls plus pros e·ls plus gualaubiers
37. vei de lauzenjar prezentiers;
38. e pes me d’ome c’a amat:
39. cum pot far amador irat?
40. Mas ges (qui qu’en crit ni·n glata!)
41. Non amon tug cil qu’an baizat —
42. so sap sidons Na Lobata.
43. Tal cug’ esser cortes entiers
44. qu’es vilans dels quatre ladriers,
45. et a·l cor dins mal ensenhat;
46. plus que feutres sembla sendat
47. ni cuers de bou escarlata
48. non sabon mais que n’an trobat —
49. e quecx quo·s pot calafata.
50. Pos non aus mos durs deziriers
51. dir, tan tem que·l dans fos dobliers,
52. maldirai los en luec d’aurat;
53. e Dieus — quar fara caritat —
54. los maldiga e·ls abata
55. sai, e pueys lai en Neiron prat
56. on recebran deliurata.
57. Palharet, non ges grans palhiers,
58. d’aquest vers ompli tos paniers
59. e porta tot ton col cargat
60. a·N Girart, de cuy ai peccat,
61. a Perpinhan part Laucata.
62. E di·l (per que m’aia comprat)
63. qu’el cassa·s e·n desbarata.
64. Ben chant (qui que s’en debata)
65. dels lauzengiers qu’an Joi baissat
66. del suc entro la sabata.
67. Joglar, s’eu ja cautz sabata,
68. qi no·us ve pauc a cavalgat,
69. ni sap per qe se debata.