BdT 389.22 — Cars, douz e fenhz del bederesc

«Cars, douz e fenhz      del bederesc» de Raimbaut d'Aurenga (BdT 389.22): texto completo, 71 versos con anotación sintáctica y bibliografía de referencia.

Raimbaut d'Aurenga — BdT 389.22

1. Cars, douz e fenhz      del bederesc       
2. m’es sos bas chanz,      per cui m’aerc;   
3. c’ab joi s’espan      viu e noire          
4. el tems que·lh grill      pres del siure   
5. chantan el mur      jos lo caire;          
6. que·s compassa e s’escaira                 
7. sa vos, qu’a plus leu de siura             
8. e ja uns non s’i aderga                    
9. mas grils e la bederesca.                  
10. Car jois e genhz      ses fuec grezesc     
11. els paucs enfanz      pasc e conderc,      
12. que nul enjan      no·i emploire.          
13. Mas en brezill      no m’aus pliure        
14. (don me rancur),      que·l blanc-vaire    
15. fai fals’amistat picvaira;                 
16. savis er fols qui s’i pliura,              
17. que greu er qu’en leis conderga            
18. fis Jois ses flama grezesca.               
19. Cars, bruns e tenhz      motz entrebesc!   
20. Pensius — pensanz      enquier e serc      
21. com si liman      pogues roire             
22. l’estraing roill      ni·l fer tiure,      
23. don mon escur      cor esclaire.           
24. Tot can Jois genseis esclaira              
25. malvestaz roill’ e tiura                   
26. e enclau Joven e serga                     
27. per qu’ira e jois entrebesca.              
28. Car naus ni lenhz      ni flums on pesc    
29. no m’es enanz,      anz vei Joi berc,      
30. anz vauc troban      com vis d’oire,       
31. que mont’ el sill      al fol yure.        
32. Tan vei Prez dur      per que·l laire      
33. lauzengiers conten e laira,                
34. e sos amars ditz eniura                    
35. Prez, per que Jois fraing e berga          
36. que·s vol cals qu’en pren e pesca.         
37. C’ar s’es empenhz,      car no m’espresc,  
38. Vidal, Costanz,      Martin, Domerc.       
39. No·m puosc ses bran      d’els decoire     
40. (per que·m corill)      c’ab un guiure     
41. de mal aur      nafro·l paire              
42. don lo fils sofris e paira                 
43. malvestat, que·l nafr’ e·l guiura,         
44. e fai Constanza, Domerga,                  
45. de domnas. Que Jois l’espresca!            
46. Car petit (menhs      que non paresc       
47. als paucs semblanz      del menor derc)    
48. que vau doptan      aur per coire,         
49. car al perill      on ie·m liure.          
50. Veg un tafur      q’en er fraire           
51. (qe·l nesi·malvatz s’afraira               
52. lai on lo francs·fis se liura);            
53. e non cre Jois plus aut derga              
54. que·l crims nais ans que paresca.          
55. Car com argenz      esmer’ e cresc         
56. ab dur colps granz      c’om fai a clerc   
57. vauc castian      Pretz . . .              
58. Mas per un fill      pot reviure,          
59. vas cui m’atur,      de bon aire;          
60. si co·l venz va sus en l’aira              
61. lo sieus noms viu, e reviura               
62. Pretz e Jois, que mong’ e·s clerga.        
63. Dieu prec qu’aital baron cresca.           
64. Cel que fa·l vers s’acompaira              
65. ab leis que ja non esquiura;               
66. que non tem correg ni verga                
67. lo fuecs que compren ses esca.             
68. Raimbautz torn’ e repaira                  
69. lai on Pretz viu e reviura, —              
70. al comte, cui Dieus aerga,                 
71. Barselones, e Honors cresca.