BdT 389.11 — Ara·m so del tot conquis

«Ara·m so del tot conquis» de Raimbaut d'Aurenga (BdT 389.11): texto completo, 69 versos con anotación sintáctica y bibliografía de referencia.

Raimbaut d'Aurenga — BdT 389.11

  1. Ara·m so del tot conquis
  2. si que de pauc me sove,         
  3. c’oblidat n’ai gaug e ris       
  4. e plor e dol e feunia;          
  5. e no·i faz semblan trop bel,    
  6. ni crei — tant ai manentia —    
  7. que res, mas Dieus, me capdel.  
  8. Car ges per mon sen no cre,     
  9. ni per prec ni per gragel,      
  10. qu’eu poges aver per re         
  11. ni conquerer tal amia           
  12. si Dieus, a cui la grazis,      
  13. no·m n’ages mes en la via       
  14. et a leis bon cor assis.        
  15. Pregarai mais de novel          
  16. que no suill de viel servis;    
  17. car dat m’a en luoc sembel      
  18. lo plus d’aquo que·l queria;    
  19. e sai per que·m det tan be:     
  20. car me conoc ses bauzia         
  21. vas leis qui·m retenc ab se.    
  22. A leis tainh amars tan fis,     
  23. per que Dieus l’autrejet me;    
  24. c’ad home qui la trais          
  25. no volc dar la seinhoria,       
  26. ni que ja·l fezes revel:        
  27. qu’ilh non deu esser traya,     
  28. tan val — mais trop ho espel!   
  29. Car s’eu dic so que·s cove      
  30. de leis que mon cor sagel       
  31. totz lo mons sap, per ma fe,    
  32. cals es; car tota gen cria      
  33. e sap, et es pron devis         
  34. cals es la meiller que sia!     
  35. Per qu’eu la laus et enquis.    
  36. Mon cor ai eu tan isnel         
  37. que a penas m’en sofris;        
  38. c’amors me pueg’ el cervel,     
  39. si que cor ai que lei dia       
  40. a totz — tals talens m’en ve —; 
  41. mas Temers e Cortesia           
  42. e dreg Ben-Amar m’en te.        
  43. Que si·m volia ses ris,         
  44. si ri mon cor de joy ple;       
  45. qu’esser cug em paradis         
  46. can de midons, c’aixi·m lia     
  47. que vas autra no·m apel,        
  48. auzi parlar ses folia,          
  49. sol c’om de leis me favel.      
  50. Per que es molt gran merce      
  51. qui·m mentau neis lo castel     
  52. on jai. Mas no sai per que      
  53. es pros qui no·n a paria        
  54. ab leis, c’ans que·l fos aclis  
  55. no sai per que ren valia,       
  56. mas pel be c’ar n’ai, m’es vis. 
  57. Que ges lanza ni cairel         
  58. non tem, ni brans asseris,      
  59. can bai ni mir son anel;        
  60. e si·n faz gran galardia        
  61. ben o dei faire jasse,          
  62. e s’om m’o ten a fulia          
  63. no sap d’amor co·s mante.       
  64. Muira ogan ab coutel            
  65. qui non tema ma fulia,          
  66. o ab peir’ o ab cairel.         
  67. Joglar, Dieus que·us fetz tan be
  68. e·us creix vostre pretz quec dia
  69. vos capdel si co·us cove.