BdT 293.33 — Lo vers comens cant vei del fau

«Lo vers comens cant vei del fau» de Marcabru (BdT 293.33): texto completo, 54 versos con anotación sintáctica y bibliografía de referencia.

Marcabru — BdT 293.33

1. Lo vers comens cant vei del fau
2. ses fuoilla la cima e·l branquill,
3. c’om d’auzel ni rana no·i au
4. chan ni grazill,
5. ni·o fara jusc’al tems soau
6. qe·l vais brondill.
7. Esegon trobar naturau
8. port la peira e l’esca e·l fozill,
9. mas menut trobador bergau
10. entrebesquill
11. me torno mon chant en badau
12. e·n fan gratill.
13. Prez es vengutz d’amont avau
14. e caseguz en l’escubill,
15. puois avers fai Roma venau;
16. ben cuit qe cill
17. no·n jauziran, qi son copau
18. d’aqest perill.
19. Avoleza porta la clau
20. e geta proeza en issil;
21. greu paireiarau mais igau
22. paire ni fill,
23. que non auch dire fors Peitau
24. c’om s’en atill.
25. Li plus d’aqest segle carnau
26. ant tornat joven e naugill,
27. qu’eu non trob, de qe mout m’es mau,
28. qui amaïstrill
29. cortesia ab cor leiau
30. qe no·is ranquill.
31. Passat ant lo saut vergondau;
32. ab semblan d’usatg’acaptil
33. tot qant que donan fan sensau,
34. plen de grondill,
35. e non prezon blasme ni lau
36. un gran de mill.
37. Cel prophetizet ben e mau
38. qe diz c’on iri’en becill —
39. seignor ser et ser seignorau —
40. e si sunt ill,
41. que·i an fait li buzat d’Anjau
42. cal d’esmerill.
43. Si amars a amic corau,
44. miga nonca m’en meravill
45. si·ll si fai semblar bestiau
46. al departill;
47. greu veirez ja joc comenau
48. al pela-cill!
49. Marcabrus diz qe no·il en cau
50. qui quer ben lo vers al foïll,
51. que no·i pot hom trobar a frau
52. mot de roïll;
53. intrar pot hom de lonc jornau
54. en breu roïll!