BdT 293.24 — En abriu s’eslairo·il riu contra·l Pa…

«En abriu s’eslairo·il riu contra·l Pascor» de Marcabru (BdT 293.24): texto completo, 25 versos con anotación sintáctica y bibliografía de referencia.

Marcabru — BdT 293.24

  1. En abriu s’eslairo·il riu contra·l Pascor
  2. e per lo bruoill naisso·il fuoill sobre la flor,
  3. bellamen, ab solatz gen, ab conort de fin’ amor.
  4. Qui a drut reconogut d’una color,
  5. blanc lo teigna, puois lo deigna ses brunor:
  6. c’amors vaire al mieu veiaire a l’usatge trahidor.
  7. Denan vos fara semblan bon per meillor;
  8. per servir gen a talen mal per peior.
  9. Vers es: per ben fait cap frait e mains laizitz per honor.
  10. Dieus mal iga amor piga e sa valor:
  11. per sa lecha pren delech a ·l bevedor:
  12. qui trop beu plus que non deu lo vins li tol la vigor.
  13. Si l’amia non crezia enganador,
  14. lausengier ni mal parlier acusador,
  15. sieus seria, si·m volia, sens bauzia e ses error.
  16. Puois q’ieu vei q’ella no·n crei chastiador,
  17. anz de totz malvatz pren patz, cals l’a groissor?
  18. A la den torna soven la lenga on sent la dolor.
  19. Denan mei n’i passon trei al passador;
  20. no·n sai mot tro·l qartz la fot, e·l qinz lai cor:
  21. enaissi torn’a decli l’amors e torna en peior.
  22. Aquist con son deziron e raubador;
  23. tuit cill gartz i clamon partz et ill en lor:
  24. e qui mieills fa sordeitz a, cum de l’agol’ an pastor.
  25. A dur auzel tol la pel cel qui escortja voutor.