BdT 293.14 — [Co]ntra [l’i]vern que s’e[n]ansa

«[Co]ntra [l’i]vern que s’e[n]ansa» de Marcabru (BdT 293.14): texto completo, 58 versos con anotación sintáctica y bibliografía de referencia.

Marcabru — BdT 293.14

  1. [Co]ntra [l’i]vern que s’e[n]ansa
  2. ab cossi[ri]er que m’as[sa]ilh,
  3. m’es belh [q]ue del chant [m]’enans
  4. ans [q]u’autre cossirs m’assalha:
  5. pus per un cosselh descresc,
  6. no m’es ops qu’autre m’en cresca,
  7. qu’ieu suy assis en trebalh
  8. e levatz en la balansa.
  9. D’aquesta say que·m trebalha
  10. e·m ten en aquest balans,
  11. qu’ab doussa sabor azesca;
  12. sos digz de felho azesc.
  13. Mos talans e sa semblansa
  14. so e no so d’un entalh,
  15. pueys del talent nays semblans
  16. e pueys ab son dig l’entalha,
  17. qu’ar si l’us tray ab mal vesc
  18. lo brico, l’autre l’envesca.
  19. L’amar d’aquesta nom falh
  20. pels tricx enoios d’amansa,
  21. ab sol qu’en amar nom falha,
  22. e·n sia d’amar amans
  23. ab guirbaudon qu’em paresca
  24. plus tozetz que no·m paresc.
  25. Per cujatz n’ay esperansa
  26. qu’enquer ab mi s’enguasalh
  27. mas tan n’a y bons esperans
  28. – estranhs, de corta guasalha –
  29. qu’en mieg mon afar folesc
  30. non dic paraula follesca.
  31. La musa port’ e·l badalh
  32. selh qu’en amar a fizansa,
  33. qu’estra grat mus’ e badalh[a]
  34. soven, so vos afizans:
  35. qu’amors adoncx entrebresca
  36. enginhos desentrebresc.
  37. Ab felhona deziransa
  38. ed estranhatg’ e baralh
  39. pays amors los dezirans,
  40. cuy vir’ e vol[v] em baralla,
  41. qu’una·m n’a en ufanesc
  42. pagut d’aital ufanesca.
  43. [. . . . . . . -alh
  44. . . . . . . . . sobransa
  45. . . . . . . . . . . -alha]
  46. d’esta qu’ieu chant es sobrans
  47. sos pretz [. . . . . -esca
  48. . . . . . . . . . -esc.]
  49. [. . . . . . . prezansa
  50. . . . . .] senes devinalh
  51. et en valor es prezans
  52. neychas segon devinalha,
  53. quar si per lieys no m’espresc,
  54. non aten qu’autra m’espresca.
  55. Selh qui fes lo vers e·l tresc
  56. no sap don si mou la tresca.
  57. Marcabrus a fag lo tresc
  58. e no sap don mou la tresca.