BdT 293.12a — Bel m’es can s’esclarzis l’onda

«Bel m’es can s’esclarzis l’onda» de Marcabru (BdT 293.12a): texto completo, 50 versos con anotación sintáctica y bibliografía de referencia.

Marcabru — BdT 293.12a

  1. Bel m’es can s’esclarzis l’onda
  2. e qecs auzels pel jardin
  3. s’esjauzis segon son latin;
  4. lo chanz per lo[r] becs toronda,
  5. mais eu trop miels qe negus.
  6. Qe scienza jauzionda
  7. m’a ’pres c’al soleilh declin
  8. laus lo jorn e l’ost’al matin,
  9. et a qec fol non responda
  10. ni contra musart no mus.
  11. Car s’avole(n)za recoinda
  12. a semblan del porc-marin;
  13. per q’ieu segnhoriu mo vezin,
  14. e no vueil ges de mi bonda
  15. so don hom m’apel caüs.
  16. Ja non er mais sazionda
  17. enveia tro en la fin,
  18. ni cobezeza atressi,
  19. q’eveios e dizironda
  20. vair’e se ven al pertus.
  21. Ni non cug mai qe·s resconda
  22. malvestatz, c’a plen camin
  23. segon ja li ric son traïn;
  24. e can c’avolez’affonda,
  25. e malvestatz crup de sus.
  26. A greu aura ja vergonda
  27. putïa de gros bosin,
  28. mas na Fro[n]t-Baldit baboïn
  29. ja acueilh, car l’i aprionda
  30. soven, qi qe s’en graüs.
  31. Car el n’a la clau segonda,
  32. per qe·l segner, so·us afin,
  33. porta capel cornut conin;
  34. c’ab sol un’empencha domda
  35. si donz, lo ditz Marcabrus.
  36. E non puesc mudar non gronda
  37. del vostre dan, moillerzin,
  38. e pos re non reman per mi,
  39. se l’us pela, l’autre tonda
  40. e reverc contra raüs.
  41. Qui·l vostre domnei sobronda
  42. esembla joc azenin
  43. e de loc en loc ris canin;
  44. e qer com Dieus lo confonda,
  45. qi sobre tot be vol plus.
  46. Qui·l vostre domnei sobronda
  47. Se·l segnoriu de Gironda
  48. poia, encar poiara plus,
  49. ab qe pense com cofonda
  50. paians, so·ilh manda Jhezus.