BdT 183.12 — Farai un vers, pos mi sonelh

«Farai un vers, pos mi sonelh» de Guglielmo IX (BdT 183.12): texto completo, 86 versos con anotación sintáctica y bibliografía de referencia.

Guglielmo IX — BdT 183.12

1. Farai un vers, pos mi sonelh
2. e·m vauc e m’estauc al solelh;
3. donnas i a de mal conselh,
4.      et sai dir cals:
5. cellas c’amor de cavalier
6.      tornon a mals.
7. Donna no fai pechat mortau
8. que ama chevaler leau;
9. mas s’ama monge o clergau
10.      non a raizo:
11. per dreg la deuria hom cremar
12.      ab un tezo.
13. En Alvernhe, part Lemozi,
14. m’en aniei totz sols a tapi:
15. trobei la moiller d’En Guari
16.      e d’En Bernart;
17. saluderon mi sinplamentz
18.      per saint Launart.
19. La una·m diz en son lati:
20. “O, Deus vos salf, don pelerin!
21. Mout mi senblatz de bel aizi,
22.      mon escient;
23. mas trop vezem anar pel mon
24.      de folla gent.”
25. Ar auziretz qu’ai respondut;
26. anc no li diz ni bat ni but,
27. ni fer ni fust no ai mentagut,
28.      mas sol aitan:
29. “Babariol, babariol,
30.      babarian.”
31. “Sor”, diz N’Agnes a N’Ermessen,
32. “trobat avem que anam queren!”
33. “Sor, per amor Deu, l’alberguem,
34.      Que ben es mutz,
35. e ja per lui nostre conselh
36.      non er saubutz”.
37. La una·m pres sotz son mantel
38. et mes m’en sa cambra, el fornel:
39. sapchatz qu’a mi fo bon e bel,
40.      e·l foc fo bos,
41. et eu calfei me volenter
42.      als gros carbos.
43. A manjar mi deron capos,
44. e sapchatz aic i mais de dos;
45. et no·i ac cog ni cogastros,
46.      mas sol nos tres;
47. e·l pans fo blancs e·l vins fo bos
48.      e·l pebr’espes.
49. “Sor, s’aquest hom es enginhos
50. e laissa lo parlar per nos,
51. nos aportem nostre gat ros
52.      de mantement,
53. qe·l fara parlar az estros,
54.      si de re·nz ment”.
55. N’Agnes anet per l’enoios:
56. Et fo granz, et ac loncz guinhos:
57. et eu, can lo vi entre nos,
58.      aig n’espavent,
59. qu’a pauc no·n perdei la valor
60.      e l’ardiment.
61. Quant aguem begut e manjat,
62. e·m despoillei per lor grat;
63. detras m’aporteron lo chat
64.      mal e felon:
65. la una·l tira del costat
66.      tro al talon.
67. Per la coa de mantenen
68. tira·l chat, el escoisen;
69. plajas mi feron mais de cen
70.      aquella ves
71. mas eu no·m mogra ges enquers
72.      qi m’aucizes.
73. “Sor”, diz N’Agnes a N’Ermessen,
74. “mutz es, que ben es conoissen”.
75. “Sor, del bainh nos apareillem
76.      e del sojorn”.
77. Ueit jorn ez ancar mais estei
78.      az aquel torn.
79. Tant las fotei com auziretz:
80. cent e quatre-vinz et ueit vetz,
81. que a pauc no·i rompei mos corretz
82.      e mos arnes;
83. e no·us puesc dir los malavegz,
84.      tan gran m’en pres.
85. E·us no sai dir los malavegz,
86.      tan gran m’en pres!