BdT 70.6 — Era·m cosselhatz, senhor

“Era·m cosselhatz, senhor” by Bernart de Ventadorn (BdT 70.6): full text, 64 verses with syntactic annotation and reference bibliography.

Bernart de Ventadorn — BdT 70.6

Era·m cosselhatz, senhor
vos, c’avetz saber e sen :
una domna·m det s’amor,
c’ai amada lonjamen ;
mas eras sai de vertat
qu’ilh a autr’ amic privat,
ni anc de nul companho
companha tan greus no·m fo.
D’una re sui en error
e·n estau en pensamen :
que m’alonje ma dolor,
s’eu aquest plaih li cossen.
e s’aissi·l dic mon pessat,
vei mo damnatge doblat.
cal que·n fassa o cal que no,
re no posc far de mo pro.
E s’eu l’am a dezonor,
esquerns er a tota gen ;
e tenran m’en li pluzor
per cornut e per sofren.
e s’aissi pert s’amistat,
be·m tenh per dezeretat
d’amor, e ja Deus no·m do
mais faire vers ni chanso.
Pois voutz sui en la folor,
beserai fols, s’eu no pren
d’aquestz dos mals lo menor ;
que mais val, mon essien,
qu’eu ay’ en leis la meitat
que·l tot perda per foldat,
car anc a nul drut felo
d’amor no vi far son pro.
Pois vol autre amador
ma domn’, eu no lo·lh defen ;
e lais m’en mais per paor
que per autre chauzimen ;
e s’anc om dec aver grat
de nul servizi forsat,
be dei aver guizerdo
eu, quo tan gran tort perdo.
Li seu belh olh träidor,
que m’esgardavon tan gen,
s’atressi gardon alhor,
mout i fan gran falhimen ;
mas d’aitan m’an mout onrat
que, s’eron mil ajostat,
plus gardon lai on eu so,
c’a totz aicels d’eviro.
De l’aiga que dels olhs plor,
escriu salutz mais de cen,
que tramet a la gensor
et a la plus avinen.
manhtas vetz m’es pois membrat
de so que·m fetz al comjat :
qu’elh vi cobrir sa faisso,
c’anc no·m poc dir oc ni no.
Donma, a prezen amat
autrui, e me a celat,
si qu’eu n’aya tot lo pro
et el la bela razo.
Garsio, ara·m chantat
ma chauso, e la·m portat
a mo Messager, qu’i fo,
qu’e·lh quer cosselh qu’el me do.