BdT 70.45 — Tuih cil que·m preyon qu’eu chan

“Tuih cil que·m preyon qu’eu chan” by Bernart de Ventadorn (BdT 70.45): full text, 55 verses with syntactic annotation and reference bibliography.

Bernart de Ventadorn — BdT 70.45

  1. Tuih cil que·m preyon qu’eu chan
  2. volgra saubosson lo ver,
  3. s’eu n’ai aize ni lezer.
  4. chantes qui chantar volria !
  5. qu’eu no·n saup ni chap ni via,
  6. pois perdei ma benanansa
  7. per ma mala destinansa.
  8. Ai las ! com mor de talan !
  9. qu’eu no dorm mati ni ser,
  10. que la noih, can vau jazer,
  11. lo rossinhols chant’ e cria,
  12. et eu, que chantar solia,
  13. mor d’enoi e de pezansa,
  14. can au joi ni alegransa.
  15. D’amor vos dirai aitan :
  16. qui be la saubes tener,
  17. res plus no·n pogra valer.
  18. per Deu, mout fo bona·lh mia !
  19. mas no·m duret mas un dia,
  20. per qu’es fols qui ses fermansa
  21. met en amor s’esperansa.
  22. Amors m’a mes en soan
  23. e tornat a no-chaler.
  24. e s’eu l’agues en poder,
  25. dic vos qu’e·n feira feunia !
  26. mas Deus no vol c’Amors sia
  27. res don om prenda venjansa
  28. ab coup d’espa’ o de lansa.
  29. Amors, e·us prec de mon dan,
  30. c’autre pro no i posc aver.
  31. ja mais blandir ni temer
  32. no·us quer, c’adoncs vos perdria.
  33. ben es fols qui’n vos se fia,
  34. c’ab vostra fausa semblansa
  35. m’avetz träit en fiansa.
  36. Pero per un bel semblan
  37. sui enquer en bon esper :
  38. mon Conort dei grat saber,
  39. c’ades vol qu’eu chan e ria.
  40. e dic vos que, s’ilh podia,
  41. eu seria reis de Fransa,
  42. car al plus qu’ilh pot, m’enansa.
  43. Lemozi, a Deu coman
  44. leis que no·m vol retener,
  45. qu’era pot ilh be saber
  46. s’es vers aco que·lh dizia,
  47. qu’en terr’ estranha·m n’iria,
  48. pois Deus ni fes ni fiansa
  49. no m’i poc far acordansa.
  50. No m’o tenh a vilania
  51. s’eu m’ai sai bon’ esperansa,
  52. pois ilh lai re no m’enansa.
  53. Romeu man que per m’amia
  54. e per lui farai semblansa
  55. qu’eu ai sai bon’ esperansa.