BdT 70.33 — Pel doutz chan quel rossinhols fai

“Pel doutz chan quel rossinhols fai” by Bernart de Ventadorn (BdT 70.33): full text, 45 verses with syntactic annotation and reference bibliography.

Bernart de Ventadorn — BdT 70.33

  1. Pel doutz chan quel rossinhols fai
  2. la noih can me sui adormitz,
  3. revelh de joi totz esbäitz,
  4. d’amor pensius e cossirans ;
  5. c’aisso es mos melhers mesters,
  6. que tostems ai joi volunters,
  7. et ab joi comensa mos chans.
  8. Qui sabia lo joi, qu’eu ai,
  9. que jois fos vezutz ni auzitz,
  10. totz autre jois fora petitz
  11. vas qu’eu tenc, que·l meus jois es grans.
  12. tals se fai conhdes e parlers,
  13. que·n cuid’ esser rics e sobrers
  14. de fin’ amor, qu’eu n’ai dos tans !
  15. Can eu remire so cors gai,
  16. com es be faihz a totz chauzitz,
  17. sa cortezi’ e sos bels ditz,
  18. ja mos lauzars no m’er avans ;
  19. c’obs m’i auri’ us ans enters,
  20. si·n voli’ esser vertaders,
  21. tan es cortez’ e ben estans.
  22. Cil que cuidon qu’eu sia sai,
  23. no sabon ges com l’esperitz
  24. es de leis privatz et aizitz,
  25. si tot lo cors s’en es lonhans.
  26. sapchatz, lo melher messatgers
  27. c’ai de leis, es mos cossirers,
  28. que·m recorda sos bels semblans.
  29. Domna, vostre sui e serai,
  30. del vostre servizi garnitz.
  31. vostr’ om sui juratz e plevitz,
  32. e vostre m’era des abans.
  33. e vos etz lo meus jois primers,
  34. e si seretz vos lo derrers,
  35. tan com la vida m’er durans.
  36. No sai coras mais vos veirai ;
  37. mas vau m’en iratz e maritz.
  38. per vos me sui del rei partitz,
  39. e prec vos que no·m sia dans,
  40. qu’e·us serai en cort prezenters
  41. entre domnas e chavalers,
  42. francs e doutz et umilians.
  43. Huguet, mos cortes messatgers,
  44. chantatz ma chanso volonters
  45. a la rëina dels Normans.