BdT 70.18 — E mainh genh se volv e·s vira

“E mainh genh se volv e·s vira” by Bernart de Ventadorn (BdT 70.18): full text, 32 verses with syntactic annotation and reference bibliography.

Bernart de Ventadorn — BdT 70.18

1. E mainh genh se volv e·s vira
2. mos talans, e ven e vai,
3. lai on mos volers s’atrai.
4. lo cors no·n pauza ni fina.
5. si·m te conhd’ e gai
6. fin’ amors, ab cui m’apai :
7. no sai com me contenha !
8. Ges amors nos franh per ira
9. ni se fenh per dih savai,
10. can es de bo pretz verai.
11. qui la ten en dissiplina,
12. re no sap que·s fai.
13. que no cove ni seschai
14. que nuls om la destrenha.
15. Eu·m sui cel qu’e re no tira.
16. si tot ma domna·m sostrai,
17. ja de re nom clamarai ;
18. car es tan pur’ e tan fina
19. que ja no creirai,
20. si de so tort li quer plai,
21. que merces no l’en prenha.
22. Per mo grat eu m’en jauzira ;
23. e pel bo talan qu’eu n’ai,
24. m’es vejaire que be·m vai.
25. gardatz : s’ela·m fos vezina,
26. s’eu n’agra re mai ? —
27. eu oc, c’aissi m’o aurai.
28. s’a lei platz que·m retenha.
29. Messatger, mot me täina
30. car tost non est lai.
31. viatz veu e viatz vai,
32. mas la chanso lh’ensenha.