BdT 70.10 — Bel m’es qu’eu chan en aquel mes

“Bel m’es qu’eu chan en aquel mes” by Bernart de Ventadorn (BdT 70.10): full text, 52 verses with syntactic annotation and reference bibliography.

Bernart de Ventadorn — BdT 70.10

  1. Bel m’es qu’eu chan en aquel mes
  2. can flor e folha vei parer,
  3. et au lo chan doutz pel defes
  4. del rossinhol matin e ser.
  5. adoncs s’escha qu’eu aya jauzimen
  6. d’un joi verai eu que mos cors s’aten,
  7. car eu sai be que per amor morrai.
  8. Amors, e cals onors vos es
  9. ni cals pros vo·n pot eschazer,
  10. s’aucizetz celui c’avetz pres,
  11. qu’enves vos no s’auza mover ?
  12. mal vos estai car dols de me no·us pren,
  13. c’amat aurai en perdos lonjamen
  14. celei on ja merce no trobarai !
  15. Pois vei que preyars ni merces
  16. ni servirs no·m pot pro tener,
  17. per amor de Deu me fezes
  18. ma domna cal que bo saber !
  19. que gran be fai us paucs de jauzimen
  20. a cel que trai tan gran mal com eu sen ;
  21. e s’aissi mor, requisitz li serai.
  22. Garit m’agra si m’aucizes,
  23. c’adoncs n’agra faih so voler.
  24. mas eu no cre qu’ela fezes
  25. re c’a me tornes a plazer.
  26. agra·n esglai e penedera s’en ?
  27. ja no creirai, no m’am cubertamen,
  28. mas cela s’en vas me per plan essai !
  29. Del major tort qu’eu anc lh’agues,
  30. vos dirai, si·us voletz, lo ver :
  31. amara la, s’a leis plagues,
  32. e servira·lh de mo poder.
  33. mas no s’eschai qu’ilh am tan paubramen ;
  34. pero be sai c’assatz for’ avinen,
  35. que ges amors segon ricor no vai.
  36. Gran mal m’a faih ma bona fes,
  37. que·m degra vas midons valer ;
  38. e s’eu ai falhit ni mespres
  39. per trop amar ni per temer,
  40. doncs que farai ? ai las, chaitiu dolen !
  41. c’a totz es mai de bel aculhimen,
  42. mas me tot sol azira e dechai.
  43. El mon non es mas una res
  44. per qu’eu joya pogues aver ;
  45. e d’aquela no·n aurai ges,
  46. ni d’autra no·n posc ges voler.
  47. pero si ai per leis valor e sen,
  48. e·n sui plus gai e·n tenc mo cors plus gen,
  49. car s’ilh no fos, ja no m’en meir’ en plai !
  50. Messatger, vai, e porta me corren
  51. ma chanso lai, Mo Frances, part Mauren ;
  52. e digas li·m que breumen lo verai.