BdT 389.30 — Joglar, fe qed eu dei

“Joglar, fe qed eu dei” by Raimbaut d'Aurenga (BdT 389.30): full text, 52 verses with syntactic annotation and reference bibliography.

Raimbaut d'Aurenga — BdT 389.30

  1. Joglar, fe qed eu dei      
  2. a Dieu ni a ma donna ni a mei,   
  3. qazutz son en esfrei             
  4. q’ar mais ancor non vei          
  5. lieis a cui totz m’autrei        
  6. per ar e per totz tems.          
  7. E serem mais ensems,          
  8. eu sai, q’o tol ma domna.  Qar trop tems? 
  9. L’un oil me·n fus redems                  
  10. q’eu non temes t’estrems;                 
  11. sol vos — se·n era sems —                 
  12. meins no me·n presasetz.                  
  13. C’anc fams, ni sons, ni setz               
  14. no·m destreis tan, uns ni tuig millia vetz,
  15. com fai sos talans fretz.                  
  16. Q’en breu de vent m’abretz                 
  17. car vos non vei, cui letz                  
  18. de sofrir mon perill.                      
  19. A! Domn’ ap cor volpill,           
  20. gran paor ai qe·il bocha me rovill 
  21. q’ar del col tro al cill           
  22. no·us bais, qi qe·n grondill;      
  23. q’eu n’iria en eissill             
  24. enanz c’autra·m baizes.            
  25. E com morrai ades!                            
  26. Si·m cocha·l bes q’eu n’aic! Q’el luec tornes!
  27. A, domna, ·l plus confes                      
  28. ome qez anc ames                              
  29. acorres, si que pres                          
  30. de vos sia mos cors!                          
  31. Ai! Talens, car no mors?                
  32. E Seignier Dieus, gitasses lo tost fors!
  33. O q’il sembles ma sors                  
  34. a cels qe sabo·l destors,               
  35. si qe nostre demors                     
  36. fos per totz acuillitz!                 
  37. Domna, no·m faz marritz              
  38. per qe·m tegna de vos per eschernitz;
  39. mas qar lur fals critz               
  40. dels enojos traitz                   
  41. tem, e tant son eissitz              
  42. del bon sen c’aver soill.            
  43. Per l’espavent mi doill                   
  44. e pel gran be, qu’avant n’ai fait orgoill,
  45. si q’ieu non deing mon oill               
  46. girar ves autre foill,                    
  47. qar mos cors no m’acoill                  
  48. q’ieu ves vos mi renei.                   
  49. Domna, si lai on soill    
  50. no·us vei en breu·m renei.
  51. Far m’en podes orgoill:   
  52. q’ans morrai qe·m renei!