BdT 389.15 — Er quant s’embla·l foill del fraisse

“Er quant s’embla·l foill del fraisse” by Raimbaut d'Aurenga (BdT 389.15): full text, 59 verses with syntactic annotation and reference bibliography.

Raimbaut d'Aurenga — BdT 389.15

  1. Er quant s’embla·l foill del fraisse    
  2. e·l ram s’entressecon pel som           
  3. (que per la rusca no·i poja             
  4. la dolz’umors de la saba)               
  5. e·ill aucel son de cisclar mut          
  6. pel freit que par que·ls destrenga —    
  7. mas ges per aitant no·m remut           
  8. que·l cor no·m traia fait de drut.      
  9. Qu’eu reverdisc et engraisse            
  10. quan tot’altr’alegresa rom;             
  11. e si tot mos gauz s’enoja               
  12. a tal c’a prezen non gaba,              
  13. ges per tant non es remanzut            
  14. qu’ab lei de cui teing Aurenga          
  15. no·m aian tan mei prec valgut           
  16. qu’ab si m’a baizan retengut.           
  17. Per qu’eu lau qu’us quecs s’en laisse,  
  18. pos malgrat lor n’ai mai del nom;       
  19. qu’er ges neus ni vens ni ploja —       
  20. si sa grans merces m’acaba              
  21. mon car desir qu’ai tan volgut —        
  22. no·m pot tolre, ni lauzenga,            
  23. l’amor que·i mes ab gran vertut         
  24. Deus, quant m’ac asi elegut.            
  25. Ha domna! si ja·m biaisse               
  26. ves vos, ni pren vouta ni tom           
  27. adoncs si’ eu pres en boja!             
  28. Si ja tan mos cors mescaba,             
  29. qu’al meu tort me virez l’escut!        
  30. E cofonda Deus la lenga                 
  31. que diz a frau ni a saubut              
  32. re per qu’amdui siam perdut!            
  33. Qu’eu non voill que de nos baisse       
  34. l’Amors, que ges del dart del plom      
  35. no·ns feri (ans sai que voja            
  36. de nos tot mal et arraba):              
  37. qu’anc no tant — deu esser crezut —     
  38. doas res — qui que s’en fenga —         
  39. no·s ameron — si Deus m’ajut —          
  40. cum nos fam e farem canut.              
  41. Ai, dona! quar tan m’abaisse            
  42. que no·us vey lay on essems fom,        
  43. no creyatz que mot no·m coja;           
  44. mas per dig d’una sillaba               
  45. er mantenen reconogut                   
  46. tot so qu’az Amor covenga:              
  47. per qu’ieu del ben qu’en agr’ agut      
  48. sai e crey qu’ieu n’ai molt perdut.     
  49. E ja trobaire no s’eslaisse:            
  50. qu’anc pos Adams manget del pom         
  51. no valc — si tot quex s’enbroja —       
  52. lo seus trobars una raba                
  53. ves lo meu que m’a erebut;              
  54. ni taing q’us tan aut s’en prenga, —    
  55. qu’eu ai trobat e cossegut              
  56. lo miels d’amor tant l’ai quesut.       
  57. E, qui m’en desmen, tost prenga         
  58. lo bran e la lans’ e l’escut,           
  59. q’eu l’en rendrai mort e vencut.