BdT 389.14 — Ar non sui jes mals et astrucs

“Ar non sui jes mals et astrucs” by Raimbaut d'Aurenga (BdT 389.14): full text, 44 verses with syntactic annotation and reference bibliography.

Raimbaut d'Aurenga — BdT 389.14

1. Ar non sui jes mals et astrucs
2. anz sui ben malastrucs de dreg;   
3. e puois malastres m’a eleg        
4. farai vers malastruc e freg.      
5. Si trop un malastruc adreg        
6. que·l malastruc cap mi pesseg!    
7. Que per totz temps sui malastrucs 
8. per un gran malastre qe·m ve;     
9. e qui per malastruc no·m te       
10. Dieu prec de malastre l’estre     
11. que mil malastruc foran ple       
12. del malastre q’ieu ai en me.      
13. Dompna, per vos sui malastrucs    
14. car per malastre·m voletz mal;    
15. e fis ben malastruc jornal,       
16. c’anc nuills malastrucs no·l fetz tal!
17. Malastruc tro manatz engal            
18. per que d’est malastruc no·us cal.    
19. Er aujatz cum sui malastrucs:         
20. qand cuich de malastre mover          
21. eu sui plus malastrucs en ver!        
22. C’ab malastre·m laissiei cazer,       
23. e pois vinc malastre querer,          
24. don aurei malastruc esper.            
25. E pus aysi soy malastrucs             
26. mos pels malastrucx mi tolray         
27. — aytan del malastre perdray —        
28. e si·l malastre no s’en vay           
29. malastrucx sia qui mi play            
30. car tan de malastre m’eschay.         
31. S’ieu atrobes dos malastrucs          
32. q’anesson malastrugamen               
33. a me mais malastre queren,            
34. adoncs for’ ieu malastrucs·gen;       
35. mas non trob malastruc valen          
36. c’a me de malastre·s prezen.          
37. Et eu sui aitant malastrucs           
38. qe de malastre port la flor           
39. et ai ben malastrug honor.            
40. Levet, malastruc de seignor,          
41. tu chantes malastre ab plor           
42. d’aquest malastruc amador!            
43. Tu iest malastrucs de seignor         
44. et ieu soi malastrucs d’amor.