BdT 389.10a — Ara·m platz, Giraut de Borneill

“Ara·m platz, Giraut de Borneill” by Raimbaut d'Aurenga (BdT 389.10a): full text, 60 verses with syntactic annotation and reference bibliography.

Raimbaut d'Aurenga — BdT 389.10a

  1. Ara·m platz, Giraut de Borneill
  2. que sapcha per c’anatz blasman      
  3. trobar clus, ni per cal semblan.    
  4. Aiso·m digaz,                       
  5. si tan prezatz                      
  6. so que es a toz comunal;            
  7. car adonc tut seran egual.          
  8. Seign’ En Lignaura, no·m coreill    
  9. si qecs s’i trob’ a son talan.      
  10. Mas eu son jujaire d’aitan          
  11. qu’es mais amatz                    
  12. e plus prezatz                      
  13. qui·l fa levet e venarsal;          
  14. e vos no m’o tornetz a mal.         
  15. Giraut, non voill qu’en tal trepeil 
  16. torn mos trobars; que ja ogan       
  17. lo lauzo·l bon e·l pauc e·l gran.   
  18. Ja per los faz                      
  19. non er lauzatz,                     
  20. car non conoisson (ni lor cal)      
  21. so que plus car es ni mais val.     
  22. Lingnaura, si per aiso veil         
  23. ni mon sojorn torn en affan         
  24. sembla que·m dopte del mazan.       
  25. A que trobatz                       
  26. si non vos platz                    
  27. c’ades o sapchon tal e cal?         
  28. Que chanz non port’ altre cabtal.   
  29. Giraut, sol que·l miels appareil    
  30. e·l dig’ ades e·l trag’ enan,       
  31. mi non cal sitot non s’espan.       
  32. C’anc granz viutaz                  
  33. non fon denhtatz:                   
  34. per so prez’ om mais aur que sal,   
  35. e de tot chant es atretal.          
  36. Lingnaura, fort de bon conseill,    
  37. etz fis amans contrarian,           
  38. e per o si n’ai mais d’affan.       
  39. Mos sos levatz,                     
  40. c’us enraumatz                      
  41. lo·m deissazec e·l diga mal,        
  42. que no·l deing ad home sesal.       
  43. Giraut, per cel ni per soleil       
  44. ni per la clardat que resplan,      
  45. non sai de que·ns anam parlan,      
  46. ni don fui natz,                    
  47. si soi torbatz                      
  48. tan pes d’un fin joi natural.       
  49. Can d’als cossir, no m’es coral.    
  50. Lingnaura, si·m gira·l vermeil      
  51. de l’escut cella cui reblan,        
  52. qu’eu voill dir: “A Deu mi coman.”  
  53. Cals fols pensatz                   
  54. outracuidatz!                       
  55. M’a mes doptanza deslial!           
  56. No·m soven com me fes comtal?       
  57. Giraut, greu m’es, per San Marsal,  
  58. car vos n’anatz de sai nadal.       
  59. Lingnaura, que ves cort rial        
  60. m’en vauc ades ric e cabal.