BdT 293.34 — Hueymais dey esser alegrans

“Hueymais dey esser alegrans” by Marcabru (BdT 293.34): full text, 49 verses with syntactic annotation and reference bibliography.

Marcabru — BdT 293.34

  1. Hueymais dey esser alegrans
  2. pus l’aura doussa vey venir,
  3. et auch lays e voutas e chans
  4. dels auzelhs que·m fan esbaudir.
  5. Lo gen temps me fai alegrar,
  6. mas per jovent me desconort
  7. quar totz jorns lo vey sordeyar.
  8. D’una ren suy meravelhans:
  9. qu’ades vey granar e florir
  10. escassetatz, oc, et enjans,
  11. vas qualque part me torn ni·m vir;
  12. cortezia, ni ben estar,
  13. ni pretz, ni valor, ni deport
  14. vas nulha part no vey renhar.
  15. Estz lauzengiers, lenguas-trencans –
  16. cuy Dieus cofonda et azir –
  17. meton proeza en balans,
  18. e fan malvestat enantir;
  19. mas als pros dic e vuelh preyar
  20. que ja us ab elhs no·s n’acort
  21. si en proeza vol renhar.
  22. Eyssamens son domnas trichans
  23. e sabon trichar e mentir,
  24. per que fan los autrus enfans
  25. als maritz tener e noyrir;
  26. d’aqui naysso·l malvat cujar,
  27. q’us no·n ama joy ni deport,
  28. ni·n auza hom entr’ elhs parlar.
  29. Ja Dieus no·l sia perdonans
  30. qui las vol onrar ni servir,
  31. estas putas ardens cremans,
  32. peiors que ieu no·us saubria dir;
  33. tan lor sap bo lo clau copar
  34. que non hi guardon dreg ni tort,
  35. mas selh que mielhs las sap ronsar.
  36. Qui anc fon prezatz ni amans
  37. per dompnas, ben s’en deu geqir,
  38. qu’aytan s’en aura us truans,
  39. o mais si mais li pot bastir,
  40. et ieu poiri’ o ben proar
  41. per ma dona na Cropafort,
  42. mas ja no la·n vuelh decelar.
  43. Messatgier cortes, ben parlans,
  44. vai t’en en Urgelh ses falhir,
  45. e sias del vers despleyans
  46. a·n Cabreira, que lo remir,
  47. e potz li dir senes guabar,
  48. qu’en tal loc ai tornat ma sort
  49. on elh poiria pro muzar.