BdT 293.30 — L’autrer jost’una sebissa

“L’autrer jost’una sebissa” by Marcabru (BdT 293.30): full text, 90 verses with syntactic annotation and reference bibliography.

Marcabru — BdT 293.30

  1. L’autrer jost’una sebissa
  2. trobei tozeta mestissa,
  3. de joi e de sen masissa:
  4. si con fillia de vilaina
  5. chap’e gonel’e pellissa
  6. viest, e camiza traslissa,
  7. sotlars e caussas de laina.
  8. A leis vinc per la chalmissa.
  9. «Bela», fiz m’ieu, «res faitissa,
  10. dol ai car lo fregz vos fissa».
  11. «Segner», so·m ditz la vilaina,
  12. «merce Dieu e ma noirissa,
  13. pauc o prez si·l venz m’erissa
  14. c’alegreta·n soi e sana».
  15. «Bella», fiz m’ieu, «douc’e pia,
  16. destortz me soi de la via
  17. per far ab vos compagnia,
  18. c’anc aitals toza vilaina
  19. non dec ses pareil-paria
  20. gardar aitanta bestia
  21. en aital terra soldaina».
  22. «Don», fetz ella, «qi qe·m sia,
  23. ben conosc sen o folia.
  24. La vostra pareillaria,
  25. segner», so·m diz la vilaina,
  26. lai on s’estai, si s’estia,
  27. car tals la cuid’en bailia
  28. tener, no·n a mas l’ufaina».
  29. «Bella, per lo mieu veiaire,
  30. cavalers fo vostre paire
  31. qe·us engenrec en la maire
  32. car fon corteza vilaina.
  33. On plus vos gart m’es bellaire,
  34. et ieu per lo joi m’esclaire –
  35. si·m fossetz un pauc umana».
  36. «Don, tot mo ling e mon aire
  37. vei revertir e retraire
  38. al vezoig et a l’araire,
  39. segner», so·m diz la vilaina,
  40. «qe tals si fai cavalgaire
  41. qe deuri’atretal faire
  42. los seis jorns en la setmana».
  43. «Bella», fiz m’ieu, «gentils fada
  44. vos faizonec cant fos nada:
  45. fina beutat esmerad’a
  46. e vos, corteza vilaina,
  47. e seria·us ben doblada
  48. ab sol un’atropellada,
  49. mi sobra e vos sotraina».
  50. «Segner, tan m’avetz lauzada
  51. qe tota·n soi enoiada.
  52. Pos em pretz m’avetz levada,
  53. segner», so·m ditz la vilaina,
  54. «per so m’auretz per soudada
  55. al partir: bada fols bada,
  56. en la muz’a meliaina!»
  57. «Toz’estraing cor e salvatge
  58. adomesz’om per usatge.
  59. Ben conosc al trespassatge
  60. d’aital tozeta vilaina
  61. pot hom far ric companjatge,
  62. ab amistat de paratge,
  63. se l’us l’autre non engana».
  64. «Don, om cuitatz de folatge
  65. jur’e pliu e promet gatge.
  66. Tant fariatz omenatge,
  67. segner», so·m diz la vilaina,
  68. «mais ieu per un pauc d’intratge
  69. non voil jes mon pieuzelatge
  70. chamjar per nom de putana».
  71. «Bella, tota criatura
  72. revertei’a ssa natura.
  73. Pareillar pareillatura
  74. devem, eu et vos, vilaina,
  75. a l’ombra lonc la pastura
  76. car plus n’estaretz segura
  77. per far pareilla dousaina».
  78. «Don, hoc, mas segon drechura
  79. encalz fols sa folatura,
  80. cortes cortez’aventura,
  81. e·l vilas ab sa vilaina,
  82. qu’en tal luec fa senz frachura,
  83. don om non garda mezura:
  84. so ditz la genz cristiana».
  85. «Toz’, anc de vostra figura
  86. non vi una plus tafura
  87. en tota gent christiana».
  88. «Don, lo chavetz nos aüra
  89. qe tals bad’a la penchura
  90. c’autre n’espera la maina».