BdT 293.3 — Al departir del brau tempier

“Al departir del brau tempier” by Marcabru (BdT 293.3): full text, 52 verses with syntactic annotation and reference bibliography.

Marcabru — BdT 293.3

1. Al departir del brau tempier
2. quan per la branca pueia·l sucs
3. don reviu la genest’e·l brucx,
4. e floreysson li presseguier
5. e la rana chant’el vivier
6. e brota·l sauzes e·l saücs,
7. contra·l termini qu’es yssucs
8. suy d’un vers far en cossirier.
9. Cossiros suy d’un gran vergier
10. ont a de belhs plansos mans lucs:
11. gent son l’empeut e·l frugs bacucs;
12. selh qu’esser degron sordegier,
13. fuelhs e flors paran de pomier,
14. son al fruchar sautz e saücs;
15. e [pueys], pus lo caps es balucs,
16. dolens son li membr’estremier.
17. Mortz son li bon arbre primier
18. e·ls vius son ramils e festucs;
19. dels fortz assays los vey damnucx,
20. mas de bordir son fazendier(s);
21. de promessas son bobansier(s),
22. al rendre sauzes e saücx,
23. don los clamam flacx e baudux,
24. ieu e tug l’autre soudadier.
25. Quan son la nueg josta·l foguier,
26. n’Esteves, en Costans e n’Ucs
27. . . . . . . . . . . . . . . . .
28. mais que Berartz de Monleyder;
29. tota nueg josten a dobblier
30. e·l jorn, a l’ombra del[s] saücx,
31. auzir(i)atz nauzas e bauducx
32. e doblar entr’els l’escaquier(s).
33. Doncx no parejon li derrier
34. en totz bos sens ab los faducx?
35. E log, si Cozer e Sarlux
36. valon Toloza e Monpeslier!
37. Qu’ieu sai quals mortz foron primier,
38. e·l mais dels vius son vers saücx,
39. e podetz dir qu’es benastrucx
40. que troba laur ni olivier.
41. Neys l’ortolas ab lo clavier
42. jos ab un vent s’en fuy, huelhs cucx;
43. per esclavina e per trabucx
44. an laissat mantelh e caussier;
45. ni ren non a·i del estagier.
46. Tal hira·m fan sautz e saücx!
47. Si no·ls ten reys o coms o ducx,
48. totz temps seran mais caminier.
49. Los pros sal Dieus qu’an pretz entier,
50. que·ls rics malvatz paron saücx
51. per que·l segles es badalucx,
52. don malavey’e desturbier.