BdT 293.19 — Doas cuidas a·i, compaigner

“Doas cuidas a·i, compaigner” by Marcabru (BdT 293.19): full text, 72 verses with syntactic annotation and reference bibliography.

Marcabru — BdT 293.19

  1. Doas cuidas a·i, compaigner
  2. qe·m donon joi e destorbier:
  3. per la bona cuia m’esgau,
  4. e per l’avol sui aburzitz.
  5. D’aital cuiar,
  6. douz et amar,
  7. es totz lo segles repleniz,
  8. si q’ieu fora ab los esmaïz
  9. si tant non saubes ben e mau.
  10. En dos cuiars ai consirier
  11. a triar lo fraich del entier:
  12. be·l teing per devin naturau
  13. qi de cuit conoisser es guiz.
  14. De folleiar
  15. no·m sai gardar,
  16. que s’ieu cuich esser de bon fiz
  17. e·l fols m’enbruig, long los auziz:
  18. e·m tornaran d’amon d’avau.
  19. La vostra cuia, soudadier,
  20. fan elusclar los baus Gaifier,
  21. q’enaissi balansen engau
  22. la cuia e·l prometres failliz.
  23. Nostre cuiar
  24. fai desviar
  25. lo mon don issic lo soriz,
  26. c’aissi vei los rics sordeziz
  27. c’un pro contradonar non au.
  28. Oi fo natz e bateiaz ier
  29. cel qi·m cuiet far encombrier:
  30. als vezis man que jes no·l lau
  31. can cuia contrafar formiz.
  32. Que per cuiar
  33. cuich esser bar:
  34. la cuia es longa e·l faiz blasiz,
  35. car de sol la cuia es fols criz:
  36. leu notz a presen et a frau.
  37. Cuiador d’amor volatgier
  38. son de sol la cuida mainier,
  39. q’en mil no·n trob una corau
  40. d’aquestas amors cuiairiz.
  41. Pero cuia[r]
  42. non dei blasmar
  43. del tot, que jovens fora auniz:
  44. si cuiars d’amor fos obliz,
  45. jois fora tornaz en canau.
  46. Moillerat cuidan volentier
  47. e, segentre·l vin e·l sabrier,
  48. mouta fola cuida e·s gau,
  49. per qe·l segles deven mestiz.
  50. Tals vol cuidar
  51. c’a bona par
  52. non enten qe Marcabrus diz,
  53. que femnas et efanz petiz
  54. an una decha comunau.
  55. Dompnas follas de fol mestier
  56. son per cuit, e fol cavallier
  57. paubre, orgoillos, de cuida brau.
  58. A! co·lz a Dieus encaitiviz!
  59. C’anc per cuidar
  60. non vim granar
  61. la cima plus que la rasiz,
  62. q’en bona cuida es hom periz
  63. si meiller obra no·i abau.
  64. Cuidan s’en van lo tort sentier,
  65. sioulan tavan per esparvier,
  66. e laissan la dreita carrau
  67. per lo conseill dels gara-niz,
  68. qui fant cuidar
  69. al ric avar
  70. so don jovens es meschausiz,
  71. e jois, es entre·ls francs-faillitz,
  72. tornatz de Basan en Bertau.