BdT 183.10 — Pos de chantar m’es pres talenz,

“Pos de chantar m’es pres talenz,” by Guglielmo IX (BdT 183.10): full text, 42 verses with syntactic annotation and reference bibliography.

Guglielmo IX — BdT 183.10

  1. Pos de chantar m’es pres talenz,
  2. farai un vers, don sui dolenz:
  3. mais non serai obedienz
  4. en Peitau ni en Lemozi.
  5. Qu’era m’en irai en eisil:
  6. en gran paor, en gran peril,
  7. en guerra laisserai mon fil;
  8. faran li mal siei vezi.
  9. Lo departirs m’es aitan greus
  10. del seignorage de Peiteus
  11. en garda lais Folcon d’Angeus
  12. tota la tera son cozi.
  13. Si Folcos d’Angeus no·l socor,
  14. e·l reis de cui ieu tenc m’onor,
  15. faran li mal tut li plusor,
  16. felon Gascon et Angevi.
  17. Si ben non es savis ni pros,
  18. cant ieu serai partitz de vos,
  19. vias l’auran tornat en jos,
  20. car lo veiran jove mesqui.
  21. Per merce prec mon conpaignon:
  22. s’anc li fi tort, qu’il m’o perdon;
  23. et il prec En Jezu del tron
  24. en romans et en son lati.
  25. De proeza e de joven fui,
  26. mais ara partem ambedui;
  27. et ieu irai m’en a Cellui
  28. on tut peccador troban fi.
  29. Mout ai estat cuendes e gais,
  30. mas Nostre Seigner no·l vol mais;
  31. ar non puesc plus soffrir lo fais,
  32. tant soi aprochatz de la fi.
  33. Tot ai guerpit cant amar sueill:
  34. cavalaria et orgueill;
  35. e pos Dieu platz, tot o acueill,
  36. e prec li que·m reteign’am si.
  37. Totz mos amics prec a la mort,
  38. que·i vengan tuit e m’onren fort;
  39. qu’ieu ai agut joi e deport
  40. loing e pres et e mon aizi.
  41. Aissi guerpisc joi e deport,
  42. E vair e gris e sembeli.