BdT 70.7 — Ara no vei luzir solelh

„Ara no vei luzir solelh“ von Bernart de Ventadorn (BdT 70.7): vollständiger Text, 60 Verse mit syntaktischer Annotation und Referenzbibliografie.

Bernart de Ventadorn — BdT 70.7

  1. Ara no vei luzir solelh
  2. tan me son escurzit li rai ;
  3. e ges per aisso no·m esmai,
  4. c’una clardatz me solelha
  5. d’amor, qu’ins el cor me raya ;
  6. e, can autra gens s’esmaya,
  7. eu melhur enans que sordei,
  8. per que mos chans no sordeya.
  9. Prat me semblon vert e vermelh
  10. aissi com el doutz tems de mai ;
  11. si·m te fin’ amors conhd’ e gai :
  12. neus m’es flors blanch’ e vermelha
  13. et iverns calenda maya,
  14. que·l genser e la plus gaya
  15. m’a promes que s’amor m’autrei.
  16. s’anquer no la·m desantreya ?
  17. Paor mi fan malvatz cosselh,
  18. per que·l segles mor e dechai ;
  19. c’aras s’ajoston li savai
  20. e l’us ab l’autre cosselha
  21. cossi fin’ amors dechaya.
  22. a ! mauvaza gens savaya,
  23. qui vos ni vostre cosselh crei,
  24. Domnideu perd’ e descreya.
  25. D’aquestz mi rancur e·m corelh
  26. qu’ira me fan, dol et esglai
  27. e pesa lor del joi qu’eu ai.
  28. e pois chascus s’en corelha
  29. de l’autrui joi ni s’esglaya,
  30. ja eu melhor dreih no·n aya.
  31. c’ab sol deport venz’ e guerrei
  32. cel qui plus fort me guerreya.
  33. Noih e jorn pes, cossir e velh,
  34. planh e sospir; e pois m’apai.
  35. on melhs m’estai, et eu peihz trai.
  36. mas us bos respeihz m’esvelha,
  37. don mos cossirers s’apaya.
  38. fols ! per que dic que mal traya ?
  39. car aitan rich’ amor envei,
  40. pro n’ai de sola l’enveya !
  41. Ja ma domna no·s meravelh
  42. si·lh quer que·m do s’amor ni·m bai.
  43. contra la foudat qu’eu retrai,
  44. fara i genta meravelha
  45. s’ilh ja m’acola ni·m baya.
  46. Deus ! s’er ja c’om me retraya
  47. („a ! cal vos vi e cal vos vei !“)
  48. per benanansa que·m veya ?
  49. Fin’ Amor, ab vos m’aparelh ;
  50. pero no·s cove ni s’eschai,
  51. mas car per vostra merce·us plai
  52. (Deus cuit que m’o aparelha !),
  53. c’aitan fin’ amors m’eschaya.
  54. ai, domna, per merce·us playa
  55. c’ayatz de vostr’ amic mercei,
  56. pus aitan gen vos merceya !
  57. Bernartz clama sidons mercei,
  58. vas cui tan gen se merceya.
  59. E si eu en breu no la vei,
  60. non crei que lonjas la veya.