BdT 389.41 — Un vers farai de tal mena

„Un vers farai de tal mena“ von Raimbaut d'Aurenga (BdT 389.41): vollständiger Text, 62 Verse mit syntaktischer Annotation und Referenzbibliografie.

Raimbaut d'Aurenga — BdT 389.41

  1. Un vers farai de tal mena         
  2. on vuelh que mos sens paresca,    
  3. mas tant ai ric’entendensa        
  4. que tostz n’estauc en bistensa    
  5. que no posca complir mon gaug;    
  6. ans tem c’un sol jorn no viva     
  7. tant es mos desirs del fait lonh. 
  8. Qu’ins en mon cor me semena       
  9. us volers, e crey que·y cresca    
  10. d’Amor que·y met tal creyssensa   
  11. que d’als non ai sovinensa,       
  12. ni res qu’ieu aya no·m fa gaug;   
  13. ans lays, e mos cors esquiva,     
  14. autre joy que d’al non ay sonh.   
  15. Pero si·n sofr’ ieu gran pena     
  16. qu’ins en mon cor sal e tresca,   
  17. qu’anc hom per belha parvensa     
  18. non trays tan greu penedensa.     
  19. Mas non ai per qu’ieu n’aya gaug? —
  20. Quar us volers m’en abriva         
  21. e·m ditz qu’en altre joy non ponh. 
  22. Ben m’a nafrat en tal vena         
  23. est’amors qu’era·m refresca        
  24. don nuls metges de Proensa         
  25. nadius no·m pot far guirensa;      
  26. ni mezina que·m fassa gaug,        
  27. ni ja non er hom qu’escriva        
  28. lo greu mal qu’ins el cor m’esconh.
  29. Qu’Amors m’a mes tal cadena        
  30. plus doussa que mel de bresca;     
  31. quan mos pessars en comensa        
  32. pus pes que·l dezirs m’en vensa.   
  33. Don per que torn mon plor en gaug  
  34. e vau quo fai res penssiva? —      
  35. Quar non aus mostrar mon bezonh.  
  36. Ben ai ma voluntat plena          
  37. de tal sen que s’entrebesca;      
  38. e cuig que m’aia tenensa          
  39. car nuls hom mais per plivensa    
  40. non estet en aitan gran gaug!     
  41. Domna, si·m fossetz aiziva        
  42. tost saubra s’en fol m’en peronh. 
  43. Mas ill non sap qual estrena      
  44. m’a dada ni cum m’adesca;         
  45. quar tant sos pretz sobregensa    
  46. qu’il no cre que per temensa      
  47. auzes ges de lei aver gaug;       
  48. qu’ill es tant nomenativa         
  49. tem, si l’o dic, no me vergonh.   
  50. Mas ben grans talans afrena       
  51. mon cor, que ses aigua pesca.     
  52. Pus no·ill o puesc a prezensa     
  53. dir, Dieus l’en don entendensa    
  54. a lieys, tal que me torn en gaug! 
  55. Que·l vers farai (que·m caliva)   
  56. dir a lieys a cuy Pretz se jonh.  
  57. Ricx hom suy si l’enten en gaug,  
  58. mas ieu no sai per que·m viva     
  59. si l’enten e pueys non a sonh.    
  60. Non entendray mo mal en gaug?     
  61. Que·l Bos Respiegz vol qu’ieu viva
  62. el mal m’estra don non ai sonh.