BdT 389.40 — Una chansoneta fera

„Una chansoneta fera“ von Raimbaut d'Aurenga (BdT 389.40): vollständiger Text, 62 Verse mit syntaktischer Annotation und Referenzbibliografie.

Raimbaut d'Aurenga — BdT 389.40

  1. Una chansoneta fera           
  2. voluntiers laner’ a dir;      
  3. don tem que m’er a murir      
  4. e far l’ai tal que sen sela.  
  5. Ben la poira leu entendre     
  6. si tot s’es en aital rima;    
  7. li mot seran descubert        
  8. al quec de razon deviza.      
  9. Bo·m sap car tan m’apodera    
  10. mos cor que non puesc sufrir  
  11. de mon talan descubrir;       
  12. c’ades puech a plena vela     
  13. (qui que veya joy dissendre)  
  14. per que no·y puesc nulh’escrima
  15. trobar, ans m’ai trop suffert  
  16. de far parer ma conquiza.      
  17. Pus ma dona m’es tan vera      
  18. (trop miels qu’ieu no·il sai grazir)
  19. s’ieu quier als, tostems m’azir!    
  20. Dieus en ira·m met’ ab ela          
  21. o·m fassa que be·m tanh pendre      
  22. per la gola d’una sima:             
  23. pro m’a dat sol lieys no pert;      
  24. Dieus m’a pagat a ma guiza.         
  25. Ben saup lo mel de la cera          
  26. triar, e·l miels devezir            
  27. lo jorn que·m fes lieys ayzir;      
  28. pus, cazen clardat d’estela,        
  29. sa par no·s fay ad contendre        
  30. beutatz d’autra, si be·s lima,      
  31. ni aya cor tan asert                
  32. de be s’aribar en Piza.             
  33. Domna, can mi colc al sera,         
  34. la nueyt (e tot jorn) cossir        
  35. co·us pogues en grat servir:        
  36. cant ieu·m pes, qui·m fer ni·m pela 
  37. no·m pot far en als entendre;       
  38. mos cors de gaug salh e guima,      
  39. tan ay en vos mon cor sert          
  40. e ma voluntat assiza.               
  41. Domna, si no·us alezera             
  42. mos cors, lay on yeu dezir,         
  43. res plus tost no·m pot aucir;       
  44. si·m tarza, pensatz de tela         
  45. al cor c’om no·s pot defendre!      
  46. Que·l vida m’es aytan prima         
  47. soven ay gaug e m’espert            
  48. e·m pes: “Mala l’ai conquiza!”      
  49. Doncx c’ay fag tan long’espera      
  50. que aysi·m degues murir?            
  51. Mas un iorn m’es vis que·m tir      
  52. un an. Lo pretz d’una mela           
  53. non tenc si no·m pot car vendre!     
  54. Dreitz! Per que mos cors m’ensima    
  55. c’ades m’estai l’uelh ubert          
  56. vas sela part on l’ay viza?          
  57. Deu prec tan de mort m’escrima       
  58. donna, e m’aia suffert               
  59. tro qu’ie·us embraz ses chamiza.     
  60. Qui trob’ amor ses escrima           
  61. ja non deu planher si pert           
  62. domna qu’es vayra e griza.