BdT 389.4 — Al prim qe·il timi sorz en sus

„Al prim qe·il timi sorz en sus“ von Raimbaut d'Aurenga (BdT 389.4): vollständiger Text, 35 Verse mit syntaktischer Annotation und Referenzbibliografie.

Raimbaut d'Aurenga — BdT 389.4

Al prim qe·il timi sorz en sus
e pel cim prim fueill del branquill,
s’agues raizon, feir’ un bon vers;
mas ma dona no vol q’eu chan
mais de leis, ni·l ven a talan;
e chanz si d’amor non es faig
no val plus com ses domna amars.
Com a lei non platz, no·n dic plus.
Sens es tot ab que m’ames ill!
E, per Dieu, si es ben envers
qe non auz chantar derenan
de lei vas cui sui voitz d’enjan
e cels cui pietz voil — fers, estraig! —
er donc oimais voigz mos chantars.
Faiziro·l segle de mon us,
lauzengier fals de faig volpill!
Ai! cant n’auran ja d’amors ters
ab lur chau parlar devinan!
Per lur ditz van domnas duptan
e an mortz drutz ses colp atraig
soven per lur fals devinars.
C’ant cist fait mil malvatz per us;
chamjan de solatz en perilh,
qe dizon de tort en travers
de cel qe lur er en semblan:
“Domn’ es vers q’ieu entenda tan ...”
Que·il domna cuig’ en tot trasaig
qe sos amics l’aia espars.
Rics hom torna tost en raus
can sufre c’om se meravill
qe non s’aussa, mai s’en fait fers
de cels que·i venon cortejan.
Ges non an colpa cil qu’o fan;
qe·l segnier n’es de tot forfaig
a cui en coven castiars.