BdT 389.28 — Escotatz, mas no say que s’es

„Escotatz, mas no say que s’es“ von Raimbaut d'Aurenga (BdT 389.28): vollständiger Text, 57 Verse mit syntaktischer Annotation und Referenzbibliografie.

Raimbaut d'Aurenga — BdT 389.28

1. Escotatz, mas no say que s’es
2. senhor, so que vuelh comensar.     
3. Vers, estribot, ni sirventes       
4. non es, ni nom no·l sai trobar;    
5. ni ges no say co·l mi fezes         
6. s’aytal no·l podi’ acabar,          
7. que ia hom mays non vis fag aytal ad
8. home ni a femna en est segle ni en  
9. l’autre qu’es passatz.              
10. Sitot m’o tenetz a foles            
11. per tan no·m poiria layssar         
12. que ieu mon talan non disses:       
13. no m’en cujes hom castiar;          
14. tot cant es non pres un pojes       
15. vas so c’ades vey et esgar,         
16. e dir vos ay per que. Car si ieu vos
17. o avia mogut, e no·us o trazia a cap,   
18. tenriatz m’en per fol.  Car mais amaria 
19. seis deniers en mon punh que mil sols   
20. el cel.                             
21. Ja no·m tema ren far que·m pes          
22. mos amicx, aisso·l vuelh prejar;        
23. s’als obs no·m vol valer manes          
24. pus m’o profer’ ab lonc tarzar;         
25. pus leu que selh que m’a conques        
26. no·m pot nulh autre galiar.             
27. Tot ayso dic per una domna que·m fay    
28. languir ab belas paraulas et ab lonc    
29. respieg, no say per que. Pot me         
30. bon’ esser, senhors?                    
31. Que ben a passatz quatre mes,           
32. (Oc! E mays de mil ans so·m par)        
33. que m’a autrejat e promes               
34. que·m dara so que m’es pus car.         
35. Dona! Pus mon cor tenetz pres           
36. adossatz me ab dous l’amar.             
37. Dieus, aiuda! In nomine patris et       
38. filii et spiritus sancti! Aiso, que     
39. sera, domna?                            
40. Qu’ieu soy per vos gays, d’ira ples;    
41. iratz·jauzens me faytz trobar;          
42. e so m’en partitz de tals tres          
43. qu’el mon non a, mas vos, lur par;      
44. e soy fols cantayre cortes              
45. tan c’om m’en apela ioglar.             
46. Dona, far ne podetz a vostra guiza, co  
47. fes N’Ayma de l’espatla que la estujet  
48. lay on li plac.                         
49. Er fenisc mo no·say·que·s’es,           
50. c’aisi l’ay volgut batejar;             
51. pus mays d’aital non auzi jes           
52. be·l dey enaysi apelar;                 
53. e diga·l, can l’aura apres,             
54. qui que s’en vuelha azautar.            
55. E si hom li demanda qui l’a fag, pot    
56. dir que sel que sap be far totas        
57. fazendas can se vol.