BdT 389.18 — Assatz sai d’amor ben parlar

„Assatz sai d’amor ben parlar“ von Raimbaut d'Aurenga (BdT 389.18): vollständiger Text, 61 Verse mit syntaktischer Annotation und Referenzbibliografie.

Raimbaut d'Aurenga — BdT 389.18

1. Assatz sai d’amor ben parlar         
2. ad ops dels autres amadors;          
3. mas al mieu pro, que m’es plus car,  
4. non sai ren dire ni comtar;          
5. qu’a mi non val bes ni lauzors       
6. ni mals-digz ni motz avars;          
7. mas ar sui vas Amor aitaus           
8. fis e bos e francs e liaus           
9. Per qu’ensenharai ad amar            
10. los autres bos dompneyadors;         
11. e si·n crezon mon essenhar           
12. far lor a d’amar conquistar          
13. tot aitan cant volran de cors!       
14. E si’ oguan pendutz o ars            
15. qui no m’en creira, qar bon laus     
16. n’auran selhs qu’en tenran las claus!
17. Si voletz dompnas guazanhar,         
18. quan querretz que·us fassan honors,  
19. si·us fan avol respos avar           
20. vos las prenetz a menassar;          
21. e si vos fan respos peiors           
22. datz lor del ponh per mieg sas nars; 
23. e si son bravas siatz braus!         
24. Ab gran mal n’auretz gran repaus.    
25. Ancar vos vuelh mais ensenhar        
26. ab que conquerretz las melhors.      
27. Ab mals digz et ab lag chantar       
28. que fassatz tut, et ab vanar;        
29. e que honretz las sordeyors.         
30. Per lor anctas las levetz pars,      
31. e que guardetz vostres ostaus        
32. que non semblon gleisas ni naus.     
33. Ab aisso n’auretz pro, so·m par.     
34. Mas ieu·m tenrai d’autras colors     
35. per so quar no·m agrad’ amar;        
36. que ja mais no·m vuelh castiar,      
37. que s’eron totas mas serors!         
38. Per so lor serai fis e cars,         
39. humils e simples e leyaus,           
40. dous, amoros, fis e coraus.          
41. Mas d’aisso·us sapchatz ben gardar,  
42. que so qu’ie·n farai er folhors.     
43. Non fassatz ver que nesci par;       
44. mas so qu’ieu ensenh tenetz car      
45. si non voletz sofrir dolors          
46. ab penas et ab loncs plorars!        
47. Qu’aissi lor for’ envers e maus      
48. si mais m’agrades lor ostaus.        
49. Mas per so·m puesc segurs guabar     
50. qu’ieu, et es mi grans deshonors,    
51. non am ren, ni sai qu’es enquar!     
52. Mas Mon Anel am, que·m ten clar,     
53. quar fon el det . . . Ar son, trop sors!
54. Lengua, non mais! Que trop parlars      
55. fai piegz que pechatz criminaus;        
56. per qu’ieu·m tenrai mon cor enclaus.    
57. Mas be·l sabra Mos Belhs Jocglars;      
58. qu’ilh val tant, e m’es tan coraus,     
59. que ja de lieys no·m venra maus.        
60. E mos vers tenra, qu’era·l paus,        
61. a Rodes, don son naturaus.