BdT 389.12 — Ara non siscla ni chanta

„Ara non siscla ni chanta“ von Raimbaut d'Aurenga (BdT 389.12): vollständiger Text, 46 Verse mit syntaktischer Annotation und Referenzbibliografie.

Raimbaut d'Aurenga — BdT 389.12

  1. Ara non siscla ni chanta         
  2. rossigniols,      ni crida l’auriols 
  3. en vergier ni dinz forest,       
  4. ni par flors groja ni blava;     
  5. e si·m nais      Jois e Chans        
  6. e creis en veillians;            
  7. car no·m ven com sol      somnejans. 
  8. Car a midonz atalanta                          
  9. qe·m loing dols!      E serai ben fols         
  10. s’eu totz temps ab leis non rest,              
  11. pos frain ma dolor plus brava;                 
  12. si qe fais       ni afans                          
  13. no·m pot esser dans,                           
  14. ni maltraigz no·m dol      paucs ni grans.     
  15. C’a pauc lo cors no·m n’avanta;      
  16. q’esquirols      non es, ni cabrols, 
  17. tan lieus com eu sui, q’el test      
  18. m’es la joia q’eu cercava;           
  19. don son jais      en trepans             
  20. e serai tot lans,                    
  21. pos ma dona vol      mos enans.          
  22. E neys noca·m n’espavanta                  
  23. lurs estols      dels fels, fals e mols    
  24. lauzengiers, cui Deus tempest,             
  25. si·m pren midonz e m’entrava               
  26. per ja mais      a mil ans                 
  27. tot als seus comans;                       
  28. q’en als cors non col      q’eu m’eslans.  
  29. Ja Deus, qe·ls jornz fes qaranta       
  30. don mos sols      es tornatz fillols,  
  31. no·m des a don ni a prest              
  32. mais re, si leis mi salava;            
  33. anz li lais      el balans             
  34. lo mon e mil tans                      
  35. contra leis qe·m tol      totz enjans. 
  36. C’ap ton cor q’el mieu se planta,           
  37. sai qe·m tols      — car donar no·m vols    
  38. domna, que Jois pais e vest, —              
  39. tot l’enjan q’a me portava.                 
  40. Gen lo·m trais.      Sain Johans!           
  41. Ar m’en creis talans                        
  42. don cairai el sol      ablasmans!           
  43. Ai! Domna prezans,                          
  44. ar penz qe·us acol      en baizans.         
  45. Joglar, vostr’enans                         
  46. voil, e Dieus lo vol      mil aitans.