BdT 389.10 — Apres mon vers vueilh sempr’ ordre

„Apres mon vers vueilh sempr’ ordre“ von Raimbaut d'Aurenga (BdT 389.10): vollständiger Text, 65 Verse mit syntaktischer Annotation und Referenzbibliografie.

Raimbaut d'Aurenga — BdT 389.10

1. Apres mon vers vueilh sempr’ ordre   
2. una chanson leu per bordre           
3. en aital rima sotil;                 
4. mas ges non ai’ us de tordre        
5. si·m pert ma par ni·m ten vil       
6. q’ieu vas mon miels no·m apil.      
7. Qar? No sai qant m’ai a viure,      
8. per qe mon cors al cor liure;       
9. e sapcha·n guidar dretz fil         
10. mos volers, e non s’ature           
11. mas en valen seinhoril;             
12. q’om no·s iau de son cortil.        
13. Soven pens q’ailhors mi derga,      
14. e pueis Amors ten sa verga,         
15. qe·m n’a ferit de grieus pols,      
16. e·m ditz c’ap mals no·m aerga;      
17. q’ieu non sui escarniz sols         
18. q’escarnitz fon ia N’Aiols.         
19. Cil qi m’a vout trist-alegre        
20. sap mais qu’i vol sos ditz segre    
21. qe Salamos ni Marcols               
22. de fatz ric ab ditz entegre:        
23. e cai leu d’aut en la pols          
24. qi·s pliu en aitals bretols.        
25. Qe·m val q’ailhor non puesc creire? 
26. Q’anc no frais copa de veire        
27. plus tost q’Amors frainh e rom —    
28. mas si·l plaz qe·l mal cor meire    
29. il sap lieu soudar ses plom; —      
30. mas ha mi soudat trop som.          
31. Viatz m’assajer’ a volvre           
32. s’Amors me volges absolvre;         
33. mas, pres en loc de colom,          
34. me fai de seschas envolvre,         
35. qe no·m gic penr’ un sol tom,       
36. e m’apella per mon nom.             
37. — Mal dic; tainh qe m’en peneda —   
38. Non! — Per qe? — Mos cors m’o veda. — 
39. Amors me tol qe·m ten trist. —        
40. Qi·t tol, non cug qe t’o reda. —      
41. So·m tol qe plus l’aurai qist —       
42. No·t tol so q’anc non agist.          
43. Si aic gaug, qe·m tol e·m merma       
44. qar mos talenz no·m aserma.           
45. Ben ai fol talan, per Crist,          
46. qar mos cors miels no s’aferma        
47. en lai on faz gen conqist             
48. q’en sai on ai mon dan vist.          
49. A Dieu prec qe mos precs auja:        
50. q’el vueilh’ e don q’ieu m’en gauja   
51. lai on son volgutz amics!             
52. Qar — ja·l sieus fins cors s’esflauja —
53. totz autres trop noms plus rics,       
54. e non o dic ges enics.                 
55. Cel Dieus qi fes terr’ e aiga,         
56. caut e freig, gent clergu’ e laiga:    
57. afol sels qe desabrics;                
58. c’ama voluntat veraiga                 
59. e ab cubertz fals presics,             
60. fan dan als drutz e destrics.          
61. Domna, franca res veraiga              
62. eu que·us sui verais amics             
63. a vos mi ren totz antics.              
64. Plus qe ja fenis fenics                
65. non er q’ieu non si’ amics.