BdT 293.18 — Dire vos vuoill ses doptanssa

„Dire vos vuoill ses doptanssa“ von Marcabru (BdT 293.18): vollständiger Text, 78 Verse mit syntaktischer Annotation und Referenzbibliografie.

Marcabru — BdT 293.18

  1. Dire vos vuoill ses doptanssa
  2. d’aqest vers la comenssanssa;
  3. li mot fant de ver semblanssa.
  4. – Escoutatz! –
  5. Qui ves proessa balanssa,
  6. semblanssa fai de malvatz.
  7. Jovens faill e fraing e brisa
  8. et amors es d’aital guisa,
  9. que pois al saut es aprisa
  10. – Escoutatz! –
  11. que chascus n’a sa devisa,
  12. ja pois no·n sera cuitatz.
  13. Amors fai cum la belluja
  14. que si mescla ab la suja,
  15. c’art lo fust e la festuja.
  16. – Escoutaz! –
  17. Cel non sap vas cal part fuja
  18. pois que del fuoc es gastatz.
  19. Dirai vos d’amor cum migna:
  20. a vos chanta, a cellui gigna;
  21. ab vos parla, ab autre cigna.
  22. – Escoutatz! –
  23. Plus sera dreicha que ligna
  24. qand ieu serai sos privatz.
  25. Amors solia esser dreicha
  26. mas er es torta e brecha,
  27. et a coillida tal deicha:
  28. – Escoutatz! –
  29. lai on non pot mordre leicha
  30. plus arreament que chatz.
  31. Anc puois amors non fo vera
  32. pos triet del mel la cera;
  33. anz sap si pelar la pera
  34. – Escoutatz! –
  35. doussa·us er cum chans de lera –
  36. si sol la coa·n troncatz!
  37. Cel qui ab amor barata,
  38. ab diables se combata!
  39. No·il cal c’autra verga·l bata
  40. – Escoutatz! –
  41. ni sap mas, cum cel qe·is grata
  42. tro que vius s’es escorgatz.
  43. Amors es mout de mal avi;
  44. mil homes a mortz de glavi;
  45. Dieus non fetz tant fort gramavi
  46. – Escoutatz! –
  47. fol no·n fassa lo plus savi
  48. si tant fai qe·l tenga al latz.
  49. S’anc amors fon car comprada,
  50. er es en viltat tornada;
  51. virginitat a passada
  52. – Escoutatz! –
  53. puois al prendre es alargada:
  54. des era vos en gardatz!
  55. Amors a usatge d’ega:
  56. que totz jorns vol c’om l’asega
  57. e freta de lega en lega,
  58. – Escoutatz! –
  59. ni no·n demandara trega,
  60. si·us etz dejuns o disnatz.
  61. Cuiatz vos q’ieu non conosca
  62. d’amor s’es orba o losca?
  63. Sos digz aplana et endoscha;
  64. – Escoutatz! –
  65. plus suavet poing que mosca,
  66. mas plus greu n’es hom sanatz.
  67. Qui ab geing de femna reigna,
  68. dreitz es que mals l’en aveigna,
  69. si cum la letra esseingna.
  70. – Escoutatz! –
  71. Malaventura·us en veigna
  72. si tuich no vos en gardatz.
  73. Marcabrus, lo fills na Bruna,
  74. fo engenratz en tal luna
  75. q’el sap d’amor cum degruna,
  76. – Escoutatz! –
  77. qez anc non amet neguna,
  78. ni d’autra non fo amatz.