BdT 293.17 — Dirai vos e mon latin

„Dirai vos e mon latin“ von Marcabru (BdT 293.17): vollständiger Text, 44 Verse mit syntaktischer Annotation und Referenzbibliografie.

Marcabru — BdT 293.17

  1. Dirai vos e mon latin
  2. d’aizo qu’eu vei e q’eu vi:
  3. non cuig qe·l segles dur gaire,
  4. segon q’escriptura di,
  5. q’era fail lo fils al paire,
  6. e·l pair’al fil autressi.
  7. Desviatz de son cami,
  8. jovens se torn’a decli,
  9. e donars q’era sos fraire
  10. vai s’en fugen a tapi,
  11. q’anc d’en Costanz l’engignaire
  12. jois ni jovenz non jauzi.
  13. Soven de pan e de vi
  14. noiris rics hom mal vezi;
  15. per cel techit de mal aire
  16. es segurs de mal mati,
  17. si no·n ment lo gazanaire
  18. dont lo reprochers issi.
  19. Qu’era eisson dui poilhi,
  20. bel, burdent, ab saura cri;
  21. pois van volven de blanc vaire
  22. e fan semblan azeni.
  23. Jois e jovenz son trichaire,
  24. e malvestatz eis d’aiqui.
  25. Moliners ditz al moli,
  26. «Qi ben lia ben desli»,
  27. e·l vilaz ditz tras l’araire,
  28. «Bos frugz eis de bon jardi,
  29. e avols fils d’avol maire,
  30. e d’avol caval ronci»
  31. Moilleratz ab sen cabri,
  32. a tal paratz lo coissi,
  33. per qe·l cons esdeve laire;
  34. e tal ditz «Mos fils me ri»
  35. qe anc re no·i ac a faire:
  36. gardatz s’es ben badoï!
  37. Re no·m val se·ls en chasti,
  38. q’ades retornan aiqi;
  39. e pueis nuls no·n vei estraire
  40. Marchabrus d’aqel trahi,
  41. an lo tondres contra·l raire,
  42. moillerat, del joc coni.
  43. Lo tondres an contra·l raire,
  44. moillerat, del joc coni!