BdT 293.15 — Cortesamen vuoill comensar

„Cortesamen vuoill comensar“ von Marcabru (BdT 293.15): vollständiger Text, 42 Verse mit syntaktischer Annotation und Referenzbibliografie.

Marcabru — BdT 293.15

1. Cortesamen vuoill comensar
2. un vers, si es qi l’escoutar;
3. e pos tant m’en sui entremes,
4. veirai si·l poirai afinar,
5. q’era voill mon chan esmerar,
6. e dirai vos de mantas res.
7. Assaz pot hom vilaneiar
8. qi cortesia vol blasmar;
9. qe·l plus savis e·l meils apres
10. no·n sap tantas dire ni far
11. c’om no·n li puosca enseignar
12. petit o pro, tals hora es.
13. De cortesia·is pot vanar
14. qui ben sap mesura esgardar;
15. e qui tot vol auzir cant es
16. ni tot qant ve cuida amassar,
17. lo tot l’es ops amesurar,
18. o ja no sera trop cortes.
19. Mesura es en gent parlar
20. e cortesia es d’amar;
21. et qui no vol esser mespres
22. de tota vilania·is gar,
23. d’escarnir e de foleiar,
24. puois sera savis, ab que·ill pes.
25. C’aissi pot savis hom regnar
26. e bona dompna meillurar;
27. mas cella q’en pren dos o tres
28. e per un no si vol fiar –
29. be·n deu sos prez asordeiar
30. e sa valors a chascu mes.
31. Aitals amors fai a prezar
32. que si mezeissa ten en car;
33. e s’ieu en dic nuill vilanes
34. per lleis, que m’o teingn’a amar;
35. be·ill lauzi fassa·m pro musar,
36. qu’eu n’aurai so qe·m n’es promes.
37. Lo vers e·l son voill enviar
38. a·n Jaufre Rudel oltramar,
39. e voill que l’aion li Frances
40. per lor coratges alegrar,
41. que Dieus lor o pot perdonar,
42. o sia peccaz o merces.