BdT 293.1 — A la fontana del vergier

„A la fontana del vergier“ von Marcabru (BdT 293.1): vollständiger Text, 42 Verse mit syntaktischer Annotation und Referenzbibliografie.

Marcabru — BdT 293.1

  1. A la fontana del vergier
  2. on l’erb’es vertz josta·l gravier,
  3. a l’ombra d’un fust domesgier,
  4. en aiziment de blancas flors
  5. e de novelh chant costumier,
  6. trobey sola, ses companhier,
  7. selha que no vol mon solatz.
  8. So fon donzelh’ab son cors belh,
  9. filha d’un senhor de castelh;
  10. e quant ieu cugey que l’auzelh
  11. li fesson joy e la verdors
  12. e, pel dous termini novelh,
  13. qu’ela entendes mon favelh,
  14. tost li fon sos afars camjatz.
  15. Dels huelhs ploret josta la fon
  16. e del cor sospiret preon
  17. «Jhesus», dis elha, «reys del mon,
  18. per vos mi creys ma gran dolors,
  19. quar vostra anta mi cofon,
  20. quar li mellor de tot est mon
  21. vos van servir, mas a vos platz.
  22. Ab vos s’en vai lo mieus amicx,
  23. lo belhs e·l gens e·l pros e·l ricx;
  24. sai m’en reman lo grans destrix,
  25. lo deziriers soven e·ls plors.
  26. Ay! mala fos reys Lozoïcx,
  27. que fai los mans e los prezicx
  28. per que·l dols m’es el cor intratz!»
  29. Quant ieu l’auzi desconortar,
  30. ves lieys vengui josta·l riu clar:
  31. «Belha», fi·m ieu, «per trop plorar
  32. afolha cara e colors;
  33. e no vos qual dezesperar,
  34. que selh qui fai lo bosc fulhar
  35. vos pot donar de joy assatz».
  36. «Senher», dis elha, «ben o crey
  37. que Dieus aya de mi mercey
  38. en l’autre segle per jassey,
  39. quon assatz d’autres peccadors;
  40. mas say mi tolh aquelha rey
  41. don joy mi crec; mas pauc mi tey,
  42. que trop s’es de mi alonhatz».